Светски познатите паради кои се дел од најпознатиот карневал во светот започнаа во петокот вечерта во Самбадром во Рио де Жанеиро. Неколку училишта за самба кои се натпреваруваа за место во елитната класа маршираа на нивните шарени платформи.

Градоначалникот Едуардо Паес официјално ја отвори церемонијата со предавање на клучевите од градот на карневалската маскота, кралот Момо.

Овогодинешниот Момо е 28-годишниот Каио Мекензи, од работничката заедница Мангуеира. Кралицата на карневалот во Рио и принцезите му се придружија, танцувајќи на самба музика додека го држеа градскиот клуч и конфети се истураа врз нив, пренесува „АП њуз“.

Прво настапи училиштето Ботафого кое преку претстава ја прераскажа својата историја. Училиштето е основано во 1894 година како веслачки клуб во истоимената населба.

Годинава првите 12 училишта за првпат настапуваат во три дена – во недела, понеделник и вторник. Ова не само што ќе им овозможи на гледачите подолго да уживаат во спектаклот, туку и ќе им овозможи на училиштата повеќе да настапуваат.

Десетици илјади гледачи на трибините, како и милиони пред телевизорите во Бразил и ширум светот, секоја година ги гледаат парадите на пистата дизајнирана од познатиот архитект Оскар Нимаер во 1984 година.

Карневалот во Рио се смета за најголемата прослава во светот. Градските власти очекуваат осум милиони посетители и финансиски обрт до милијарда долари.