Козињак е традиционално слатко велигденско лепче, кое е неизбежно на празничната трпеза. За овој деликатес Јованка Јанкоска Бобе, која стои зад блогот bobesbakery.mk, фејсбук и инстаграм-профилот го споделува рецептот од баба ѝ .

Козињак (милиброд)

Тестото го делам на два дела од едниот дел печам милиброд, класичен со суво грозје, а од другиот дел печам ролат со афион (мак).

Потребни состојки за тесто:

– 1 килограм брашно
– 4 јајца
– 1 жолчка за премачкување
– 1 пакување свеж квасец
– 1 пакување ванилин шеќер
– 500 милитри млеко
– 3 супени лажици шеќер
– прстофат сол
– 100 грама бело грозје отстоено во рум
– 100 грама црно грозје отстоено во ликер од вишњи
– рендана кора од портокал

Потребни состојки за филот од мелен афион:

– 250 милилитри млеко
– 500 грама шеќер
– 1 пакување ванилин шеќер
– 100 грама мелен афион
– 100 грама црно грозје отстоено во рум
– 150 грама мелени бисквити
– 100 грама путер

Напомена:

Сите состојки, освен путерот и бисквитите мелени, се варат околу 15 минути и се тргаат од оган. Тогаш се додава путерот и бисквитите и се остава филот да се излади.

Подготовка на тесто:

Се замесуваат брашното со квасецот – стасан во дел од млекото (250 милилитри) и јајцата, шеќерот и солта. Додека се замесува тестото по потреба се додава млеко. На убаво измесено тесот се додава рендана кора од портокал, па се измесува, па тестото се остава 60 минути да стаса, да се удвои. Потоа се размесува и се додава белото и црното грозје. Тестото се дели на два дела: едниот дел го ставам во тркалезната модла, а другиот дел го делам на два дела за долгата модла. Од двата дела се расукува долга тесна кора, во средина се става ладен фил со афион и се затвора кората како ролат, филот да остане внатре. Потоа се земаат двата ролати и се плетат со вртење меѓусебе, плетенката се става во долгнавеста модла.
Се оставаат да стасаат 30 минути, покриени со крпа.
Се премачкуваат со жолчка и се посипуваат со шеќер. Се печат во загреана рерна на 200 степени, 30-40 минути.