Македонскиот саксофонист Горан Папаз со гордост ја сподели радоста од родителството, објавувајќи фотографија од своите три бебиња, кои деновиве наполнија три месеци.

„Три месеци, мама и тато психофизички стабилни. Одиме понатаму…“, напиша тој во описот на фотографијата, каде што преслатките Луна, Лазар и Лена лежат едно до друго.

Да потсетиме, славниот музичар, кој на јавноста ѝ стана познат по ангажманот во групата „Суперхикс“, ја објави среќната вест дека ќе стане татко во август минатата година и ги покажа фотографиите од ултразвукот.

„Шансите да добиеш природна тројка биле 1 на 1.000. Ние победивме! Вака изгледа скрининг на три бебиња во меше.

П.С. Го решив проблемот со барање музичари за бенд“, напиша Папаз во описот.

Неговата сопруга Наташа се породи во декември минатата година.

Горан и Наташа стапија во брак пред две години. Тогаш направија голема свадбена прослава, на која присуствуваа членови на блиското семејство и нивните пријатели.

„Јас сум најсреќниот човек во универзумов. Фала ви на сите што сте дел од мојов, нашиот живот, ми го направивте денот најубав. Нате, не дека си моја, ама најубава си ми. Те сакам до небото“ напиша тогаш познатиот саксофонист.

Инаку, музичарот веќе има еден син од претходниот брак, Дамиан.