Во едно кафуле во скопската населба Аеродром осамна трогателен мурал посветен на прерано починатиот музичар Андреј Ѓорѓиески од популарното дуо „ДНК“. На ѕидот е нацртан неговиот лик, а испишани се и дел од стиховите на песната „Круг“, која била омилена на сопственикот на локалот.

Фотографија од муралот сподели и сопругата на Андреј, Наталија, која емотивно се заблагодари за укажаната почит.

„Заедно сите расневме, се смеевме, журкавме до бесвест, тагувавме, плачевме… Љубовта кон Андреј и ‘ДНК’ секојдневно ја пренесував низ нивните песни во кафулето“, споделува сопственикот на локалот, Дамјан, кој додава дека веста за смртта на Андреј го затекнала токму таму, додека се обидувал да најде утеха во книга.

Тогаш одлучил да ги спои трите нешта кои најмногу му значат: локалот, Андреј и омилената песна „Круг“. Така настанал муралот кој денес буди емоции кај многумина.

„Андреј ќе живее вечно. Како низ песните, така и преку муралот кој ќе нè потсетува на неговото дело и ќе ни буди убави спомени“, додава тој и упати благодарност до уметникот и неговата екипа за поддршката и реализацијата.

Голема загуба за македонската сцена: Андреј и Панчо од „ДНК“ – хумани музичари со големо срце