Пејачката Tамара Тодевска вчера присуствуваше на натпреварот меѓу македонската фудбалска репрезентација и Велс, давајќи им поддршка на нашите фудбалери.

Во Националната арена „Тодор Проески“, 39-годишната пејачка беше во друштво на своите деца, Хана и Дарен, партнерот Лука и татко ѝ Велко.

Таа сподели фотографии од атмосферата, како и видеа од клучните моменти – загревањето со песните на „ДНК“, едноминутниот молк во чест на жртвите во Кочани, навивањето и прославата на голот.

Да потсетиме, меѓу 59-те жртви беа пејачот Андреј Ѓорѓиески, придружниот вокал Сара Пројковска, гитаристот Андреј Коларов, тапанарот Ѓорѓи Ѓорѓиев, пијанистот Филип Стевановски, битбоксерот Мартин Атанасовски – Буцо, тонецот Игор Велков и официјалниот фотограф на „ДНК“, Александар Ефремов.

Раперот Владимир Блажев – Панчо и гитаристот Горан Тонев сè уште се хоспитализирани.

Тодевска се прости од своите колеги со емотивна објава на својот инстаграм-профил.

„Денеска нè напуштија наши верни колеги, уметници, невидени таленти и предобри луѓе.
Немам зборови кои можат да ја опишат оваа болка и тага. Лута сум, гневна, тажна, разочарана.

И не сакам да бирам зборови и сето ова да звучи ‘пристојно’ и ‘коректно’. Затоа што тука веќе одамна ништо не е пристојно, ништо не е на цена, а човечкиот живот најмалку.

Со Андреј имам преубави моменти, заеднички настапи, концерти и дружби… Сара! Нема уметник во Македонија на кој му ‘нема чувано грб’, душа од човек и другарка. Фичо беше невиден талент… Ѓорѓи беше наш колега, чие време допрва доаѓаше…

Оставете ја ‘шупата’. Нека сведочи за нашата мизерија, за колективната негрижа, корупцијa. Нас ни нема спас.

Големо сочувство до семејствата и блиските на моите колеги, другари, до сите луѓе кои денеска загинаа во Кочани… до следната трагедија.