Во текот на денот меѓу граѓаните почнаа да се шират информации дека цените на нафтените деривати од идната недела ќе се зголемат за дури 10 денари по литар гориво.

Ова создаде редици на бензинските пумпи во сите градови, а возачите брзаат да наточат гориво по актуелните цени.

Според граѓаните, гужвите и паниката дополнително ги зголемила и одлуката на дел од компаниите да ја ограничат количината на гориво кое возачите можат да го наточат во возилата. Од компанијата „Макпетрол“ попладнево соопштија дека нема рестрикции во снабдувањето со горива, дека редиците се поради најавено поскапување.

Вработени на бензиска пумпи од Тетово и од Скопје потврдуваат дека на дел од нивните пумпи не се точело гориво во вредност поголема од 1.000 денари.

„Од вчера на некои пумпи во Тетово и околината не беше дозволено да се точи гориво за повеќе од 500 до 1.000 денари, а денеска добивме забрана да точиме во канти, дозволено е само во возила. Многу луѓе доаѓаа со по десет-дваесет канти, но ги враќавме“, вели за „Слободен печат“ вработен на бензиска пумпа.