Берлинската техно парада „Рејв д Планет“ (Rave the Planet) била „во голема мерка мирна“, соопшти полицијата во неделата, еден ден откако стотици илјади луѓе излегоа на улиците во главниот град на Германија за да ја прослават културата на електронската музика, јавува германската новинска агенција ДПА.

Портпаролката на полицијата рече дека се поднесени 56 кривични пријави за кривични дела, вклучително и сексуални напади и насилство, додека евидентирани се 29 административни прекршоци.

Вкупно 21 полицаец се здобил со повреди во текот на парадата, која се движела низ паркот Тиергартен во центарот на Берлин помеѓу Бранденбуршката порта и Споменикот на победата.

Во услови на високи температури, медицинските служби лекувале околу 600 луѓе од проблеми – од мали исекотини до проблеми поврзани со алкохол и дрога, вклучително и напади.

Бројката била поголема од минатогодишните 500 интервенции.

Организаторите очекувале 300.000 луѓе да присуствуваат на поворката, со 30 парадни пловила и околу 300 музичари.

Полицијата не дала прецизна проценка за бројот на учесниците, но рекла дека „стотици илјади“ се приклучиле на забавата.

Настанот „Rave the Planet“ за првпат го покрена во 2022 година д-р Моте, диџеј кој помогна да се основа познатата „Парада на љубовта“ во 1989 година.

„Парадата на љубовта“ беше голем годишен фестивал на техно музиката и демонстрација што заврши по смртоносниот метеж во западниот град Дусибург во 2010 година.

Д-р Моте повторно бил присутен во саботата, зборувајќи ѝна публиката дека љубовта е посилна од омразата и насилството.

Германската министерка за култура Клаудија Рот, исто така, испратила аудиопоздрав до насобраните, во која изјавила дека „техното е повеќе од само бучава“ и дека е фундаментален дел од културната сцена во Берлин.

– Рејвот не знае за потекло, пол и за социјален статус – рекла Рот.