ФОТО | Спектакуларно шоу на „Шанел“: Манекенките ја претворија улицата во Манчестер во модна писта
![](https://www.slobodenpecat.mk/wp-content/uploads/2023/12/FotoJet-63.jpg)
Познати личности, манекенки и неколку стотици светски лица од модата се собраа на улица во Манчестер, Англија, за да ја погледнат модната ревија на францускиот луксузен бренд „Шанел“. Манекенките ја претворија улицата во модна писта за престижната модна ревија, пишува „Би-би-си“.
Актерите Кристен Стјуарт, Хју Грант и Тилда Свиндон беа меѓу ѕвездите на улицата „Томас“ во северниот дел во градот, како и режисерката Софија Копола.
![](https://www.slobodenpecat.mk/wp-content/uploads/2023/12/profimedia-0827669950.jpg)
Манекенките, вклучително и Карен Елсон од Манчестер, ја искористија улицата како модна писта, со мешавина од популарните барови и традиционални продавници кои го надополнија шоуто „Матиерс д’арт“ (Metiers d’Art).
Манекенките и гостите беа заштитени од поројниот дожд со монтажен покрив кој беше поставен на улицата специјално за оваа пригода.
![](https://www.slobodenpecat.mk/wp-content/uploads/2023/12/profimedia-0827642905.jpg)
Модните експерти беа изненадени дека Манчестер е изборот за ова спектакуларно шоу на „Шанел“. Но, претседателот за мода на компанијата, Бруно Павловски, рече дека тие биле привлечени од „креативната енергија“ и музичката историја на градот.
Модната ревија ги вклучи познатите бендови од Манчестер, како што се „Д фол“ и „Њу ордер“ како и познати хип-хоп имиња, користејќи ја нивната музика во позадина.
![](https://www.slobodenpecat.mk/wp-content/uploads/2023/12/Snapinsta.app_408991457_18409697506022727_359857112498104898_n_1080-e1702032375357.jpg)
Меѓу 600-те присутни гости беа и актерите Џена Колман, Калум Скот Хауелс, Гугу Мбата-Роу и Луси Бојнтон.
Во изминатите две недели, пабовите и продавниците околу оваа улица беа затворени откако компанијата започна со својата организација. Луксузниот бренд „Шанел“ ги компензираше бизнисите поради нивното затворање, но не откри колкава сума потрошиле во градот.
![](https://www.slobodenpecat.mk/wp-content/uploads/2023/12/Snapinsta.app_408916667_18409697476022727_7593408498789766201_n_1080-e1702032436184.jpg)
Советникот Лутфур Рахман, член на кабинетот на Манчестер за култура, исто така не сакаше да каже колку платила компанијата, но рече дека таа „инвестирала во градот“ и дека настанот ќе и помогне на локалната економија.