Величествената Фиренца нуди многу, па дури и наједноставната прошетка низ нејзините улици ќе ви делува како да сте во најпрекрасниот музеј во светот – тука твореле и работеле големите Данте Алигиери, Донатело, Ботичели, Микеланџело, Макијавели, Леонардо да Винчи, Галилео Галилеј итн.

Една од најубавите атракции е, секако, катедралата „Богородица Цветна“, дело на архитектот Арнолфо ди Камбио, кое денес восхитува илјадници туристи. Исто така, и средновековниот мост „Понте Векио“ е нешто што вреди да го посетите. Овој живописен мост е најпознат по продавниците – порано тоа биле разни занаетчии, а денес се продавачи на сувенири и златари.

Покрај неверојатната архитектура, фасцинантната уметност и вкусната италијанска храна, Фиренца е одлична дестинација и за овој празничен период од годината, каде што ќе доживеете прекрасна празнична атмосфера.

Колевка на ренесансата

Фиренца е колевка на ренесансата, позната по сиот развој во уметноста и по придонесите на учените луѓе како Леонардо да Винчи и Микеланџело.

Ако планирате да отпатувате во овој италијански град, тогаш ликовниот музеј „Уфици“ е нешто што не смеете да го пропуштите. Тој е еден од најголемите и најстарите музеи во светот и содржи бројни бесценети ликовни дела. Тука ќе имате можност да ги видите делата на Сандро Ботичели, меѓу кои и „Раѓањето на Венера“, Караваџо, Леонардо да Винчи, Тицијан, Микеланџело итн. Цената за стандарден билет во музејот е 12 евра, но доколку сакате да купите билети однапред и да го резервирате својот влез во конкретен термин, тоа ќе ве чини 19 евра.

„Давид“ на Микеланџело е ремек-дело со кое започнала ренесансната ера. Статуата го претставува библискиот лик Давид во момент на сосредоточување пред борбата со Голијат, и е извајана како симбол на средновековната држава Фиренца. Денес туристите имаат можност да ја видат во „Галеријата на Академијата“, во Фиренца, каде што е заштитена од оштетување. За оние што не планираат да го посетат овој музеј, на „Палацо Векио“ има верна реплика на оригиналната статуа.

Храна што ќе ве освои по првиот залак

Италијанската кујна е една од најпознатите во светот и претставува вистинска хармонија од префинети вкусови. Фиренца не нуди само уживање со ренесансната уметност, туку и гастрономска уметност која се случува „зад кулисите“ на речиси секој ресторан.

Еден од најпознатите ресторани со улична храна е „Антико Винајо“, кој е семеен бизнис на семејството Мацанти. Тие ја почнале приказната на „Антико Винајо“ во 1989 година. Како што растела популарноста на сендвичарницата, така „Антико Винајо“ се претворила во синџир сендвичарници – покрај четирите локации во Фиренца, денес можете да ги вкусите нивните сендвичи и во Рим и Милано. Еден од најпопуларните сендвичи, кои можете да ги најдете на нивното мени, е „Ла Триколоре“ – лепче со говедско карпачо, крем од ф’стаци, сирење страчатела и сечкани лешници. Ова задоволство ќе ве чини 11 евра.

Но, не смеете да си заминете од Фиренца без да го пробате најавтентичниот сендвич во градот – сендвич со лампредото. Многумина знаат да кажат дека овој уникатен деликатес е „стар колку ‘Палацо Векио’ и сакан како поезијата на Данте“. Oвој сендвич бил гастрономски изум на Италијанците од работничката класа, кои можеле да си ги дозволат само помалку посакуваните делови од говедското месо, вклучувајќи ги четирите стомаци на животното. Во суштина, станува збор за лепче со говедско шкембе и салса верде – магдонос, оцет, лук, кромид и маслиново масло. Една од најпознатите сендвичарници, каде можете да го пробате овој деликатес, е „Трипајо дел Порчелино“, каде што сендвичот ќе ве чини 4 евра.

Доколку сакате да се почестите со нешто нешто слатко, нема да згрешите ако пробате чоколадо или џелато од познатиот италијански синџир „Венчи“, основан од Силвијано Венчи. По нејзиното основање во Торино во почетокот на 1878 година, компанијата се проширила низ Италија со својот Нугатин, мали бонбони кои се направени од мелени и карамелизирани лешници обложени со темно чоколадо. Денес тие имаат широк десертен асортиман, кој ќе ги освои дури и оние што најмногу пребираат.

Божиќни базари

Еден од најубавите божиќни базари во Италија, но и во цела Европа, е сместен на плоштадот покрај Базиликата на Светиот Крст во Фиренца. Оваа традиција има потекло од Германија и е дел од божиќното празнување во градот во последните 500 години.

И покрај тоа што има германско потекло, а се случува во Италија, овој базар претставува интересен микс од повеќе различни европски култури. Кога ќе пристигнете, ќе ме пречекаат пријатни ароми на специјалитети од Полска, Грција, Франција, Шпанија, Холандија и Австрија, меѓу другото. Па, ако сакате да направите мала пауза од италијанската кујна, тука ќе имате можност да уживате во вкусни германски колбаси, француски колачиња, шпански чуроси, холандски вафли, австриски переци итн. Секако, топлото греено вино е нешто што ќе ве згрее и дополнително ќе ве расположи. Овој пијалак, кој многумина го нарекуваат „Божиќ во чаша“, на речиси секој штанд ќе ве чини 4 евра.

Исто така, на повеќе штандови ќе забележите прекрасни рачни изработки – лампиони, празнични украси за домот, украсни чаши, накит. Овие уникатни парчиња се совршен избор за божиќен подарок, а постои и можноста да ги добиете со персонализирана порака за личноста на која ѝ е наменет подарокот.