Подобрување на квалитетот на воздухот, намалување на бучавоста во градовите и на бројот возила во сообраќајот, поддршка на националните и европските зелени политики, како и економски бенефити за граѓаните, ќе бидат само дел од придобивките на електричните автомобили на Avant2Go, најави вицепремиерот Изет Меџити.

Меџити, кој денеска заедно со министерката за енергетика Сања Божиновска по повод промоцијата на проектот пристигна со електрично возило пред Владата, изјави дека Avant2Go не е само технолошка новина, туку е и стратешка инвестиција во еколошката, сообраќајната и економската иднина на државата.

Новиот проект реализиран во партнерство помеѓу Владата и словенечката компанија Авант Кар Македонија нуди 100 електрични возила и разгранета мрежа на паркинг-локации кои од денеска се достапни во Гази Баба, Аеродром и Чаир. Изнајмувањето ќе чини 22 денари за километар.

– Користењето на целосно електрични возила значи нулта емисија на штетни гасови, што директо придонесува за намалување на аерозагадувањето, особено во урбаните средини. Електричните возила се значително потивки од класичните, а според светските стандарди едно Car-Sharing возил заменува 10 до 15 приватни возила – потенцира Меџити.

Новиот модерен систем за целосно електрично споделено возење Avant2Go Car-Sharing е достапен преку мобилна апликација.