Пејачката и актерка Џенифер Лопез беше уловена од папараците при купувањето на мебел во Лос Анџелес со својата ќерка Ема, а прстенот на нејзината рака ги поттикна гласините дека повторно се верила со актерот Бен Афлек.

Лопез е снимена за време на купувањето, а на нејзината лева рака е воочен голем дијамантски прстен. Пејачката дополнително ги поттикна гласините за веридбата бидејки, кога сфати дека папараците ја чекаат на излезот од продавницата, таа го заврте прстенот, сокривајќи ја страната со дијамант кон својата дланка.

Доколку дијамантот е всушност веренички прстен, тоа би била втора веридба за овој славен пар, кој својата романса повторно ја обнови во 2021 година, откако во 2004 година ја откажа веридбата. Пред само два месеци, Лопез беше на промотивна турнеја за својот нов филм „Омажи се за мене“, на која зборуваше за повторно разгорената љубов со Бен Афлек.

Пред 18 години тие ја прекинаа врската бидејќи медиумското влијание беше премногу големо и бурно нешто за нив.

Филмската ѕвезда изјави кај Елен Деџенерис дека „никогаш не ни можела да замисли“ дека ќе се врати повторно во прегратките на Бен Афлек, но додаде дека „тоа е прекрасна работа“. Изгледа дека и тогаш ја имала на ум свадбената церемонија бидејќи и на премиерата на новиот филм носеше венчаница.

Лопез и Афлек пред две децении за малку не прошетаа до олтарот откако за првпат се верија, па така во 2004 година ја раскинаа веридбата откако медиумскиот притисок стана премногу силен за нив.

Лопез во јуни 2004 година се омажи за Марк Ентони со кој ги доби близнаците Ема и Макс кои се родија во 2008 година. Во меѓувреме, Афлек се венчаше со Џенифер Гарнер во јуни 2005 година и доби три деца со актерката: Виолет, Серафина и Самуел.

Меѓутоа, Лопез и Афлек повторно се вљубија во април 2021 година откако пејачката ја прекина веридбата со бејзбол суперѕвездата Алекс Родригез.