Куќата во која е снимена култната франшиза „Halloween“ е на продажба за 1,8 милиони долари.

Вилата во Пасадена, Калифорнија е во сопственост на исто семејство речиси три генерации и е неверојатни 5.258 квадратни метри, во кои има четири спални соби и три бањи, пишува „Њујорк пост“ (Nypost).

„Да, ова беше локацијата за снимање на филмот „Halloween“ од 1978 година, како куќата на Лори Строд (Џејми Ли Кертис)“, навела агентката за недвижности Хајди Бабкок во описот на имотот, кој бил пуштен на продажба вчера.

„Ако го гледате филмот, ќе ја препознаете озлогласената клупа на која седеше Џејми Ли Кертис, држејќи тиква“, додала Бабкок.

Таа изјавила дека куќата е поделена на три посебни единици.

„Единицата бр.1 е голем стан со една спална соба со бања, дневна, трпезарија, кујна, остава, подрум и голема веранда. Втората единица има два кревети, бања и кујна, а третата има еден кревет и бања, дневна и кујна“, се наведува во описот на куќата.

Според агентката, секоја од трите единици има прекрасен поглед на околните дрвја и соседството, а „овој исклучителен имот е прекрасно место за живеење, работа и игра во една од најпосакуваните заедници во округот Лос Анџелес“.

Како што потсетува „Њујорк пост“, Кертис (64) првпат ја играше Лори Строд во култниот филм од 1978 година и ја повтори улогата неколку пати пред последното продолжение на франшизата во 2022 година.