ФОТО | Салата на УКИМ од 2,5 милиони евра демолирана и претворена во јавно веце
Спортската сала наменета за Универзитетот „Св. Кирил и Методиј“ – Скопје (УКИМ) изградена пред 3 години на кампусот зад Економскиот факултет, претворена е во депонија полна со шут, отпад со демолирани кошеви и столчиња, објави Радио Моф. Во како што пишува порталот сега може да влезе кој сака во неа, бидејќи салата е оставена без врата. Објектот чии темели биле поставени уште во 2013 година сега целосно е запуштен, руиниран и оставен на милост и немилост како јавен нужник.
Препорачано
За изградбата на салата, за која е надлежна Агенцијата за млади и спорт (АМС) и беше дел од проектот за изградба на 35 спортски сали од Владата, беа издвоени 2,5 милиони евра од државниот буџет. Тендерот му припадна на Друштвото за градежништво, трговија и услуги „Алконпроект“ од Скопје.
Во моментов, од Агенцијата за млади и спорт го има само логото над главниот влез на салата која секојдневно се распаѓа во сопствениот отпад, пишува порталот на Радио МОФ. Однадвор, освен отстранетата врата и неколкуте скршени прозори, зградата е целосно готова и доколку се изземат разните графити на фасадата, таа изгледа речиси пристојно.
Вистинскиот шок започнува внатре. Во средина на салата се искршените и фрлени кошеви и изместени голови, а мрежите висат заедно со бројните пајажини. Покрај ситните отпадоци што даваат знаци дека салата секојдневно служи како контејнер на несовесните граѓани, подот на салата е ишаран со дамки од урина, а врз него има и расфрлани црвени столчиња од трибините, стакло и други градежни материјали и пластични предмети.
Пред речиси десет години, кога беа ставени камен темелниците на објектот, од тогашната Влада беше ветено дека изградбата на салата ќе трае две години и потоа објектот ќе се предаде на користење на УКИМ.
Една деценија по најавувањето на ултрамодерната сала што требаше да ја добијат студентите на четирите факултети на овој кампус, таа е готова, но сепак не е во состојба да служи како простор каде треба да се одржуваат редовни часови по предметот Спорт и здравје.
Повеќе за оваа сторија прочитајте на линкот во продолжение.
