Отпечаток од рака стар 4.000 години е пронајден во древна египетска гробница што британските куратори ја подготвувале за изложба, пишува Би-би-си.

Откриен е од истражувачи на Универзитетот Кембриџ на „куќа на душата“ – глинен предмет во облик на зграда, кој обично се наоѓа во гробници.

Кураторката Хелен Струдвик изјави дека целиот отпечаток од рака, кој датира од 2055 до 1650 година п.н.е., е „ретко и возбудливо“ откритие.

Ќе биде изложен во Музејот Фицвилијам, како дел од универзитетската изложба „Направено во антички Египет“, која ќе се отвори на 3 октомври.

„Отпечатокот е направен од творец кој го допрел пред глината да се исуши. Никогаш порано не сум видела толку комплетен отпечаток од рака на египетски предмет“, рекла Струдвик.

Изложбата е фокусирана на луѓето кои се занимавале со древни египетски занаети.

Иако се зачувани многу примери на грнчарија, многу малку детали се познати за самите грнчари, во споредба со другите древни египетски мајстори.