ФОТО | Првата дама ги оправда очекувањата: Меланија Трамп во елегантна креација на Адам Липес на утринска миса пред инаугурацијата
Првата дама Меланија Трамп утрово на миса пред инаугурацијата на нејзиниот сопруг Доналд Трамп како 47. претседател на САД облече палто и здолниште од американскиот дизајнер Адам Липес, пишува „Вог“.
Препорачано
Во текот на првиот мандат на нејзиниот сопруг, Меланија најчесто носеше облека од реномирани европски дизајнери како „Долче и Габана“ и „Александар Меквин“, а за победничката вечер на изборите се одлучи за „Диор“. Сепак, нејзиниот избор на Адам Липес за оваа инаугурација носи специфична порака. Кампањата на Доналд Трамп беше силно насочена кон поддршка на американската економија, а Липес, кој е роден и работи во Њујорк, претставува независен американски бренд кој го отелотворува тој дух.
Во 2017 година, на својата прва инаугурација, Меланија носеше облека од иконата на американската мода, Ралф Лорен. Тоа беше симболичен потег за национално единство, особено бидејќи и Хилари Клинтон го носеше истиот дизајнер. Лорен е познат по својата неутралност и соработка со први дами од различни политички опции, а неодамна ја облекуваше и Џил Бајден.
Поддршка за независните американски брендови
Изборот на Адам Липес сугерира дека Меланија Трамп сака да ја користи модата како алатка за поддршка на домашните, независни брендови. Овој потег потсетува на изборите на нејзините претходнички, Џил Бајден и Мишел Обама, кои на своите инаугурации ги промовираа помалите американски дизајнери како Маркариан, Изабел Толедо и Џејсон Ву.
Иако беше отсутна од поголемиот дел од кампањата, минатата година Меланија го претстави својот мемоар „Меланија“, кој го истакна нејзиниот стремеж за градење сопствен јавен имиџ. Ангажирањето со модната индустрија може да биде дел од тој процес, но реакциите кон нејзините избори досега биле мешани.
Предизвиците за модната сцена
Додека некои дизајнери се дистанцираат од соработката со семејството Трамп за да останат верни на своите прогресивни вредности, други гледаат можност за големо внимание. Облекувањето на првата дама може да стане стилски репер за конзервативната публика, што е таргет група на брендови како Липес, „Каролина Херера“ или „Оскар де ла Рента“.
И покрај некои негативни коментари на социјалните мрежи, соработката со Меланија Трамп може да донесе корист за дизајнерите на долг рок. Само времето ќе покаже дали ризикот вреди, но изборот на Липес за овој значаен ден ја нагласува неговата верба во можностите што ги носи оваа соработка.
