Над 19 луѓе починаа, а стотина се повредени денеска во Непал во насилни протести против блокирањето на социјалните мрежи, објави државната телевизија, пренесе Ројтерс.

Непалската полиција употреби солзавец и гумени куршуми за да ги растера демонстрантите кои се обидоа да влезат во парламентот. Како резултат на тоа, властите воведоа полициски час околу зградата на парламентот, кој ќе остане во сила сè додека ситуацијата не се стабилизира, според соопштение на полицијата.

Илјадници млади луѓе, вклучувајќи студенти, беа запрени од полицијата која постави барикада од бодликава жица за да ги спречи да маршираат кон парламентот. Демонстрантите изразуваа незадоволство поради блокадата на платформите за социјални медиуми, која беше воведена на 4 септември.

Владата соопшти дека повеќето платформи, вклучувајќи Фејсбук, Икс и ЈуТјуб, се блокирани бидејќи не се регистрирале кај државата, додека ТикТок, Вибер и три други платформи ќе можат да работат во Непал затоа што се регистрирани.

Предлог-законот, кој сè уште не е усвоен, предизвика критики како средство за цензура и казнување на оние кои протестираат преку интернет. Групите за човекови права предупредуваат дека мерката го ограничува правото на слободно изразување и ги крши основните граѓански права.