Ски центарот Попова Шапка, утринава се разбуди под нова снежна покрива од околу 15 сантиметри.

Ратраците на ски центарот уште синоќа ги поминале ски патеките, каде за да има безбедно скијање, треба да паднат уште минимум петнаесетина сантиметри снег, велат од раководството на центарот.

„Имаме околу 15 сантиметри снег, цел скијачки центар е покриен со снег, но тој не е доволен за да почне скијачката сезона. Ние синоќа ги поминавме со ратрак патеките за да го зачуваме снегот, недај боже да има некој ветер, одма може да го однесе снегот. Сепак очекуваме некои нови врнежи во наредните денови, за да можеме конечно да ја започнеме скијачката сезона. Ќе ни треба некаде од 30 до 40 сантиметри снег за да можеме да имаме безбедно скијање. Се е подготвено, само ни недостасува снегот, кој се очекува да паѓа деновиве, вели Адем Авзиу директор на Ски центарот Попова Шапка.

Со новите врнежи од снег се зголеми и заинтересираноста на туристите за посета на Ски центарот Попова Шапка.

„Има голема заинтересираност за нови туристи , ние сме подготвени за сезона, но што се вели тоа е божја работа, ние зависиме од природен снег. Секако имаше и претходно туристи за новогодишните празници, оти беше сончево времето и двете жичари работеа, за туристите да можат да се прошетаат на Шар Планина, вели Авзиу.

Од раководството на центарот, посочија дека оваа сезона ќе има благо покачување на цената на ски картите, но не повеќе од 20% од минатогодишната цена на ски билетите.