ФОТО | Под мразот и снегот на Алпите: Планинарка случајно открила цел екосистем постар од диносаурусите
Длабоко под снежните падини на Алпите се криело праисториско изненадување – екосистем постар од диносаурусите кој случајно го открилa планинаркa додека се искачувалa на италијанскиот дел од највисокиот планински масив во Европа, пишува „НБЦ“.
Препорачано
Откритието вклучува добро сочувани отпечатоци од влекачи и водоземци за кои научниците велат дека живееле пред 280 милиони години во Пермскиот период.
„Диносаурусите сè уште не еволуирале во тоа време, но животните одговорни за најголемите отпечатоци пронајдени овде сè уште биле импресивни, достигнувајќи должина до три метри“, рекол Кристијано Дал Сасо, палеонтологот од Природонаучниот музеј во Милано.
Фосилите се откриени во планините на Ломбардија во северна Италија, откако снегот и мразот што ги прекриле се стопиле како последица на климатските промени. Клаудија Стефенсен минатото лето пешачела по патека на планинскиот масив Валтелина Ороби кога згазнала на сив камен со чудни шари.
„Мојот сопруг беше пред мене и гледаше напред додека јас гледав во моите нозе. Видов карпа, која беше чудна како парче цемент. Потоа забележав кружни шари со брановидни линии. Гледав повнимателно и сфатив дека тоа се отпечатоци“, изјавила Стефенсен за „Гардијан“.
Заинтригирана, таа направила неколку фотографии и ги споделила со нејзиниот пријател и фотограф на природата Елио Дела Фереро, кој го контактирале Дал Сасо во музејот во Милано.
Дал Сасо ангажирал двајца специјалисти, професорот по стратиграфија Аусини Рончи од Универзитетот во Павија и експертот за фосили Лоренцо Маркети од Природонаучниот музеј во Берлин.
Маркети изјавил за „НБЦ“ дека е „изненаден од квалитетот и квантитетот на фосилниот материјал“ и дека ниту едно пермско фосилно место не е толку „богато“.
Рончи исто така рекол дека е „изненаден од количината и зачувувањето“ на фосилите.
„Ова е првпат да видиме толку различни отпечатоци од ‘рбетници, траги од без’рбетници, флора и други фосили“, рекол Рончи.
Минатото лето Дела Ферера и неговиот истражувачки тим започнаа инспекција, фотографирајќи и мапирајќи стотици фосилизирани патеки низ планинскиот венец. Првите фосили беа пренесени со хеликоптер пред еден месец.
