Според експертката за патувања Џил Мекелрој, буџетот за патување не мора да ве ограничува да престојувате во здодевно сместување. Така таа открила пет најчудни европски хостели, од преуреден „Боинг 747“, до поранешен воен затвор во кој престојот е зачудувачки евтин, пишува „Дејли мејл“.

Затворот „Кароста“ во Латвија

Прв на листата хостели на Џил се најде затворот „Кароста“ (Karosta) во Латвија.

– Дали некогаш сте посакале да ја доживеете последната ноќ на слобода? Па, затворскиот хотел во Латвија ќе направи да се почувствувате дека тоа навистина е вашата последна слободна ноќ – раскажала Џил Мекелрој.

Станува збор за еден поранешен воен затвор, сега отворен за туристи, со хотел сместен во рамките на функционалниот затвор.

На овој хотел му се доделуваат бонус-поени, бидејќи персоналот е упатен да се однесува кон гостите како кон вистински затвореници, им ги одземаат личните предмети и ја казнуваат „непослушноста“. Доколку сакате да изнајмите само кревет за спиење, тоа чини 15 евра и претставува обична дрвена клупа во ќелијата, додека за цела ќелија треба да платите 30 евра.

Хостел „Џамбо“ во Стокхолм

Хостелот „Џамбо“ (Jumbo) е сместен во обновен „Боинг 747“. Овој хостел содржи сè што е потребно за пријатен престој. Пилотската кабина е претворена во пријатна соба, а главната кабина содржи широки спални соби, бањи, па дури и место за дружење. Хостелот се наоѓа на 20 метри оддалеченост од аеродромот „Стокхолм – Арланда“, така што гостите во текот на својот престој во хостелот имаат можност да уживаат во погледот на авионите кои поминуваат низ пистите.

„Клинк Норд“ во Амстердам

Овој хостел се наоѓа во близина на Централната станица по должина на култните канали на градот.

– Нема да пронајдете подобро место во градот – вели Џил.

Хостелот „Клинк Норд“ (Clink Noord) се наоѓа во просториите на некогашната лабораторија на „Шел“ и подобрени се карактеристиките на оригиналната зграда од 1920 година.

Диџеите создаваат одлична атмосфера во барот „Зинг“, а претсобјето исполнето со растенија служи како одлично место за опуштање по јога. Во хостелот исто така има и кафуле, ресторан, книжарница, кино, кујна со самопослужување и ноќен клуб. Ноќевањата чинат од 40 до 50 евра.

Хостел „Кејвленд“ на Санторини

Овој хостел се наоѓа на популарниот грчки остров Санторини.

– „Кејвленд“ делува луксузно, со простран базен, соби коишто изгледаат како современи пештери и широка програма на настани, вклучувајќи ги филмските вечери, грчките вечери за дегустација, јогата и многу други активности – објасни Џил.

Ноќевањето во оваа „пештера“ чини 31, 50 евра.

Хостелот „Кејвленд“ (Caveland) исто така е иницијатор на бројни зелени иницијативи кои имаат за цел ограничувањето на влијание на хостелот на животната средина, како што се: потполна забрана за употреба на пластика за еднократна употреба, компостирање на отпадот, администрација без документи и одржливо управување со водата.

– Олицетворение на животот на грчкиот остров, овој пристапен хостел е идеален за оние што сакаат да се чувствуваат како да престојуваат на традиционален имот – рекла Мекелрој.

Куќата „Сандеман“ во Порто

Куќата „Сандеман“ (Sandeman) во Порто, се наоѓа во вински подруми на „Сандеман“, во рамките на една од најлегендарните згради во овој португалски град. За подобро искуство во хостелот, сите кревети се направени во облик на буре за вино.

– Очекувајте индивидуални капсули за спиење, пространи соби, бар на отворено и ноќни португалски семејни вечери со бесплатно вино – опиша Џил.

Овој хостел се наоѓа на пет минути од популарниот историски центар на Порто и има поглед на реката Доуро. Креветите во „винскиот хостел“ чинат 31, 50 евра.