Музичката дива Шер (76) и нејзиното момче Александер Едвардс (37) го имаа своето прво јавно појавување на црвениот тепих. Имено, двојката присуствуваше на ревијата на модната куќа „Версаче“ во Холивуд, на која беше претставена колекцијата за сезоната есен/зима 2023 година.

Љубовната врска на пејачката и музичкиот продуцент предизвика бројни реакции во медиумите, но и на социјалните мрежи, поради големата разлика во години. Сепак, Шер важи за позната личност на која не ѝ е важно мислењето на конзервативната јавност, па без двоумење размени нежности и бакнежи со својот нов партнер пред бројните фоторепортери.

Како што пишува „Дејли мејл“, Шер и Едвардс првпат беа видени како се држат за рака на почетокот на ноември, а набргу потоа ја потврдија врската.

„Шер е свесна за тоа дека постои голем скептицизам во врска со оваа романса, но таа не се грижи за тоа. Ужива во вниманието и вели дека таа и Едвардс имаат нешто многу посебно поради што се чувствува полна со живот. Таа никогаш не се чувствувала толку секси како сега“, споделил близок извор за „Ју-ес викли“.

Шер неодамна гостуваше во емисијата на Кели Кларксон, каде зборуваше за својот помлад партнер.

„Па, на хартија е малку смешно, но во вистинскиот живот одлично се сложуваме. Тој е фантастичен, а јас не им давам квалитети на мажите кои не го заслужуваат тоа. Тој е многу, многу љубезен, многу е паметен, многу е талентиран и навистина е забавен. И мислам дека е прилично згоден“, раскажа Шер во „The Kelly Clarkson Show“.

Двојката неодамна потврди дека работи на нова музика, а Едвардс веќе ги запознал синовите на Шер – Чез Боно (54) и Елајџа Блу Елман (46), кои ги нарекувал „моите дечки“. Исто така, продуцентот открил дека Шер е „неверојатна“ со неговиот тригодишен син Слаш Електрик, кој го доби со поранешната партнерка Амбер Роуз (39).

Едвардс и Роуз се разделија во 2021 година, откако таа го обвини дека ја изневерил со 12 жени, нешто што и самиот го признал. Но, и покрај непријатната ситуација, тие имаа пријателски однос поради заедничкото родителство.