Вториот најголем дијамант откриен досега, со неизбрусени 2.492 карати, е откопан во Боцвана во рудникот на канадската компанија „Лукара дајмонд“, објави „Би-би-си“.

Тоа е и најголемиот дијамант од откривањето на дијамантот „Кулијана“, кој има 3.106 карати и е откриен во Јужна Африка во 1905 година. Тој е исечен на девет парчиња, кои се дел од британскиот кралски накит.

Дијамантот е ископан во рудникот „Карове“, на околу 500 километри северно од Габороне, главниот град на Боцвана. Властите на таа земја објавија дека станува збор за најголемиот дијамант откриен на нивна територија.

Претходно, најголемиот дијамант откопан во Боцвана беше пронајден во 2019 година во истиот рудник.

Боцвана е еден од најголемите производители на дијаманти во светот, со околу 20 отсто од производството.

„Пресреќни сме што пронајдовме неверојатен тежок дијамант од 2.492 карати“, изјави извршниот директор на „Лукара дајмонд“, Вилијам Лам.

Компанијата не даде дополнителни детали за квалитетот и вредноста на скапоцениот камен.

Дијамантот е откриен со специјална технологија, патентирана од компанијата „Лукара дајмонд“, која се користи за откривање и зачувување на високо вредни дијаманти за да не се скршат за време на ископувањето.