ФОТО: Најдобрите македонски кошаркари ќе играат во главните квалификации за Евробаскет 2025
Најдобрата македонска кошаркарска репрезентација одигра најдобро кога беше најпотребно. Во клучниот натпревар за влез во главните квалификации за Европското првенство 2025, избраниците на селекторот Александар Јончевски славеа убедливо со 41:79 против Норвешка.
Препорачано
Одлично, само како што можевме да посакаме го отворивме натпреварот на одлука во Осло. Предводени од незапирливиот Ти-Џеј Шортс, Македонија брзо постави доминација во играта. На истекот на првата четвртина имавме двојно повисока предност (24:12), половина од тие поени беа на Шортс.
Она што беше, се чини уште поважно, одигравме цврсто во одбраната. Имавме само мал временски пад во играта, кога го немавме Шортс на теренот. Но, тоа беше од „краток рок“, Норвежаните само во два наврати успеаја негативата да ја намалат на едноцифрена.
Така беше во 15 минута, кога Норвешка намали на 18:26. Но ,тројката на Магдевски дојде во вистинско време, за да се смири и бучната публика во Осло, за 29:18. Со серијата од 11:2 дојдовме до уште повисоки 38:20, потоа и 40:22, за да го финишираме едно од нашите најдобри полувремиња во претквалификациите со највисоки (45:26).
Третиот дел од играта беше и „најсиромашниот“ кога станува збор за ефикасноста. Андреј Маслинко, нашиот крилен играч врза шест поени во серија со кои одново Македонија „побегна“ на плус од повеќе од 20 поени, кој со три реализирани слободни фрлања го покачи капитенот Војдан Стојановски, за највисок плус (60:36).
Последната четвртина беше потврда на нашата одлична партија во главниот град на Норвешка. По тројката на Маслинко, што беше прва во второто полувреме за нашата селекција, водевме со +30 (69:39), па на теренот во Арената „Нордстранд“, а на паркетот добија шанса и играчите со помала минутажа.
Најефикасен во нашите редови беше Шортс со 22 поени (по шест скокови и асистенции), следен од В. Стојановски кој запиша 16 коша. За Норвежаните единствено „двоцифрен“ беше Харалд Фреј со 10 поени.
ПРЕТКВАЛИФИКАЦИИ ЗА ЕП 2025
ГРУПА „Д“
РЕЗУЛТАТИ 6. КОЛО
Норвешка – МАКЕДОНИЈА 41:79
Данска – Словачка 71:72
КОНЕЧНА ТАБЕЛА
1.МАКЕДОНИЈА 6 5 1 436:375 11 бодови
2.Словачка 6 4 2 439:436 10
3.Норвешка 6 2 4 380:409 8
4.Данска 6 1 5 426:453 7
