Историскиот црвен џемпер со црна овца, на принцезата Дијана е прикажан во аукциската куќа „Сотби“, заедно со писмата испратени меѓу Бакингемската палата и дизајнерите, пишува „Дејли мејл“.

Опишано како едно од најкултните парчиња облека што некогаш е носено од член на кралското семејство, ќе биде изложен во лондонската галерија на „Сотби“ од 17 до 19 јули.  Потоа, испланирана е инаугуративната продажба во Њујорк, каде што за првпат ќе се најде на аукција на 7 септември, со проценета цена од 40.000 до 70.000 фунти.

Прицезата Дијана, првпат го носеше волнениот џемпер, со црно-белиот мотив на овците, во јуни 1981 година, на поло натпревар со нејзиниот вереник Чарлс, тогашниот принц од Велс.

Тоа беше едно од првите парчиња дизајнирани од Сали Муир и Џоана Озборн за нивната етикета за трикотажа „Warm & Wonderful“, а откако Дијана го облече, нивниот бренд стана популарен во јавноста.

Според аукциската куќа, Дијана го оштетила ракавот на облеката, можеби со тоа што го потфатила со нејзиниот веренички прстен. Поради тоа, од Палатата им пишале на „Warm & Wonderful“, барајќи да се поправи. Но, од модната куќа одлучиле дека е најдобро да го заменат.

Инаку, поминаа речиси три децении од смртта на принцезата Дијана. Таа загина во сообраќајна несреќа во Париз, во 1997 година. Заедно со нејзиниот тогашен партнер Доди Фајед, додека се возеле со голема брзина во обид да и избегнат папараците, трагично го губат својот живот.

Погребот на принцезата го следеа 2,5 милијарди луѓе ширум светот. Од свршувачката со принцот Чарлс, хуманитарната работа и необичната харизма, принцезата Дијана го привлече вниманието на светската јавност, а важи за една од најпопуларните и најфотографираните жени во светот.

По нејзината смрт, колекционерите со години се борат да поседуваат еден од предметите на принцезата, кога ќе излезат на аукција.