Годината која полека изминува им донесе прекрасни мигови на љубовно поле на повеќе македонски познати личности, особено на оние кои го изговорија судбоносното „да“ и ја прославија нивната љубов со саканите.

Многумина од нив споделија фотографии од свадбените прослави, кои денес се убав спомен за еден од најважните денови во нивните животи. Впечатливи венчаници, романтични моменти и весела атмосфера се нештата кои се заеднички за секоја од нив.

Во продолжение, ќе се потсетиме на оние македонски познати личности кои „рипнаа во тавче“ во 2023 година.

Даниел Кајмакоски

Пејачот Даниел Кајмакоски и неговата избраничка Марина стапија во брак во јануари годинава. Победникот на регионалниот „Икс фактор“ сподели неколку фотографии од  од граѓанската церемонијата пред матичар. Неколку месеци подоцна, двојката го доби и синот Стефан.

Антониа Гиговска

Младата и талентирана Антониа Гиговска му го изговори судбоносното „да“ со нејзиниот партнер Роберт Спасенцовски кон крајот на април. Пејачката се одлучи за тесна венчаница од чипка со долги ракави, а младоженецот облече кафеав костум и бели патики. Нивниот син Киан се роди неколку месеци подоцна – на 15 јули.

Христијан Тасковски – Таско

Раперот Христијан Тасковски – Таско и неговата сопруга Наташа направија црковна венчавка во мај годинава. Инаку, парот стапи во брак во 2022 година, но свадбената прослава со бројните гости ја оставија за неколку месеци подоцна. Кратко по свадбата, тие го добија синот Лукијан.

Емра Куртишова и Петар Стојанов

Актерката Емра Куртишова, која публиката ја запозна и засака како Исаура од серијата „Преспав“, се омажи за нејзиниот партнер и колега, Петар Стојанов на почетокот од месец јуни. Свадбената прослава ја направија во Гевгелија, од каде потекнува младоженецот.

„Мој си е, си го земав“, напиша актерката во описот на свадбените фотографии, кои ги објави на својот инстаграм-профил.

Парот ја доби ќерката Лена во октомври.

Татјана Стојановска

Десет години откако се свршија, телевизиската презентерка Татјана Стојановска и нејзиниот партнер Михаил Китановски се венчаа во јуни годинава.

За „Слободен печат“, Стојановска накратко раскажа за нивната свадбена прослава.

„Пред точно 10 години, на 10 јуни 2013 година, Михаил ме побара за жена на нашиот прв одмор во Грција, и тогаш по неколку месеци од запросувањето, почнавме да живееме заедно. И точно на десетгодишнината од запросувањето, вчера стапивме и официјално во брак. Регистрацијата и прославата се одржаа во хотел ‘Александар Палас’, заедно со нашите најблиски роднини и пријатели. Беше весело благодарение на групата ‘Соната’ и бисерниот глас на Кате, како и на нашите весели гости“, изјави таа за нашиот медиум еден ден по венчавката.

Мартин Филиповски и Андреа Белеска

Мартин Филиповски, гитаристот во музичкото дуо „Некст тајм“, и ракометарката Андреа Белеска стапија во брак по неколкугодишна љубовна врска. Вљубениот пар направи свадба во Кичево, родниот град на Белеска.

„Конечно и јас стапнав на лудиот камен. Заедно со мојата сакана сопруга Андреа и нашиот сакан кум Иво ви благодариме на сите за честитките и ве поздравуваме!“, напиша Филиповски на својот инстаграм-профил по венчавката.

Инаку, музичарот и спортистката се заедно од 2015 година, а неколку години ја одржуваа врската на далечина поради ангажманите на Белеска во странство.

Стефан Лазаров

Стефан Лазаров е еден од најпознатите македонски креатори на содржина на платформата Јутјуб, кој денес има нешто повеќе од 100.000 претплатници на неговиот канал „Лазаров“.

Тој ја запроси неговата сакана Марта на стадионот „Камп ноу“ во Барселона, Шпанија, за време на натпревар на неговиот омилен фудбалски клуб – Барселона. Една година подоцна, на 18 јули, младата двојка направи црковна венчавка и голема забава во еден скопски ресторан со голем број гости.

Александра Шијакоска

По 12-годишна врска, модната блогерка Александра Шијакоска и нејзиниот вереник Едмонд Весели ја прославија нивната долгогодишна љубов со мала забава, на која присуствуваа нивните најблиски роднини и пријатели.

Како што сподели и самата блогерка, Весели го прослави својот роденден на 19 јули, па затоа решиле на истиот ден да стапат и во брак. Големата свадбена церемонија ја планираат за следната година.

Шијакоска беше облечена во елегантна бела венчаница, а косата ѝ беше собрана во опавче. Весели беше облечен во бело палто, бела маичка и бели панталони. Интересно е дека целата тема на прославата беше во фокусот на белата боја, па и останатите гости биле облечени во бели комбинации.