Традицијата на славење на Св. Валентин е најверојатно една од најдолгите во историјата на христијанството. Првите честитки и подароци за Св. Валентин датираат од Англија и Шкотска, во раниот среден век, кога постоел обичај на прагот на саканиот да се остави љубовна порака и кутија колачиња спакувани со чипка или со некој друг материјал.

Во некои земји постоел обичај на девојката да ѝ се подари нешто слатко, а доколку таа пробала од десертот, тоа било знак дека се согласува да го поминете остатокот од животот заедно.

Велат дека љубовта доаѓа преку стомакот, особено кога јадете нешто слатко. По тој повод поразговаравме со Катерина Алексовска, професионална слаткарка, чии десерти ги вкусиле илјадници луѓе од сите краеви на светот.

Слатките на Катерина ги имаат пробано голем број туристи кои летувале во луксузниот хотел со пет ѕвезди „Медитеран“ во Хрватска и оние кои крстареле со европските крузери на „Еделвајс Гастро“. Уметноста која ја создава ја презентира преку фејсбук – профилот „Magic Art“.

По повод Денот на вљубените – Св. Валентин, Катерина ни открива неколку љубовни десерти кои се послатки кога се јадат во пар.

Колаче со љубовна порака

Интересен десерт чија популарност го освои светот. Колачето со порака претставува крцкава школка со вкус на ванила и путер прелиена со бело чоколадо и декорирана со шеќерни срца. Во внатрешноста на овој десерт се крие рачно напишана љубовна порака, а неретко и понуда за брак или веренички прстен.

Пред да го вкусите ова колаче треба да го скршите со двете раце на половина и да ја прочитате пораката, а потоа може да уживате во неговата крцкава текстура и сладок вкус.

Торта за двајца

Торта за двајца, или Валентин торта, е чоколаден десерт во форма на срце кој е наменет да се подели меѓу двајцата партнери.

Љубовта најчесто се врзува со вкусот на чоколадото, а во комбинација со две чаши црвено вино овој десерт преминува во афродизијак кој ја разгорува страста.

Оваа торта секогаш е декорирана со посебно внимание. За да се интензивира чоколадниот вкус се збогатува со чоколадна глазура или чоколаден фил во црвена или розева боја.

Љубовни колачиња со ѓумбир

Колачињата со ѓумбир се едни од најкреативните слатки задоволства за Денот на вљубените. Нивната форма и подготовка овозможува да бидат декорирани и персонализирани со кратка љубовна порака или фотографија. Се подготвуваат од брашно, путер, цимет, мед и ѓумбир, а нивниот мирис ги опива сите сетила.

Љубовните колачиња од ѓумбир може да бидат декорирани со кралска глазура, чоколада, фондан и други слаткарски техники.

Чоколадни рози

Доколку сакате вашата партнерка да ја изненадите со букет рози и кутија чоколади овој десерт е две во едно. Оригиналното име на овој десерт е торта на стапче кој со фондан декорација добива форма на роза. Интересен десерт со крцкава чоколадна обвивка исполнета со чоколадна торта.

Кога ќе споите повеќе чоколадни рози ќе добиете интересен јадлив букет кој одново ќе го освои срцето на вашата сакана.

Мафини

Овој десерт со француско – англиски корени е популарен насекаде во светот, а сладокусците го јадат најчесто за појадок со млеко или за ужина со кафе, или кога било во денот, бидејќи се вкусни и брзо заситуваат.

Интересното е што секогаш овој десерт се подарува во пар, што го прави совршен да го подарите на вашиот партнер или партнерка по повод Денот на вљубените.

Најчесто е исполнет и декориран со чоколаден крем, а за изгледот да биде комплетен се збогатува со шеќерни декорации или интересни форми направени од фондан.

Макаронс

Романтичен и многу нежен десерт кој се подготвува со големо внимание. Како што е кревко вљубеното срце исто така е кревок и овој десерт. Се подготвува со внимателно избрано состојки меѓу кои белка од јајце, шеќер и брашно од бадем.

Макаронс се француски слаткарски производ кој е исклучително уникатен и привлечен пред сѐ заради својот изглед. Популарноста на овие колачиња им се зголемува кон крајот на дваесетиот век, но стануваат особено атрактивни во последнaве десетина години со доминацијата на социјалните мрежи.

Макаронс колачите во Франција ги донел личниот готвач на италијанската кралица Катерина Медичи, но тие секогаш ќе останат во нашата перцепција како француски сладок деликатес. Колачиња со префинет изглед од кои е доволно да изедеш само едно и да ја задоволиш желбата за слатко, како што е доволно само еден/а за срцето да биде полно.

Прочитајте повеќе за Денот на вљубените:

Денот на вљубените: Кој беше Валентин, светецот на романтичната љубов?

Ја славиме љубовта: Романтични идеи за подарок за Денот на вљубените

Најголемите славни љубови: Љубов која поместува планини и го надминува времето