Британската кралица Елизабета Втора имаше голема љубов кон животните, особено кон прекрасните велшки корги, кучиња кои ги чуваше од најрана возраст.

Во текот на нејзиниот живот, таа се грижеше за повеќе од 30 кучиња, од кои голем дел беа наследници на нејзината омилена Сузан што ја доби за нејзиниот 18. роденден.

Луѓе блиски до кралското семејство тврдат дека кучињата биле навистина обожавани во Бакингемската палата и дека имале вистински кралски третман – тие имале свое мени на исхрана и пространи кревети. И покрај тоа што многумина сметале дека кралицата има премногу кучиња, вклучувајќи го и нејзиниот сопруг, принцот Филип, таа не сакала да се раздели од ниту еден од своите миленици.

Поранешниот кралски тренер на кучиња, д-р Роџер Магфорд неодамна гостуваше во утринската емисија „This Morning“ и се присети на моментот кога ја советувал кралицата да го намали бројот на нејзините миленици.

„Таа имаше премногу кучиња, а тоа мислење го имаше и нејзиниот сопруг, принцот Филип“, се присети кралскиот тренер, додавајќи дека во тоа време кралицата имала меѓу 9 и 12 кучиња.

Сепак, кралицата Елизабета го игнорирала мислењето на својот сопруг и се пошегувала дека веќе нема да го ангажира д-р Магфорд ако тој се согласува со него.

Кога д-р Магфорд ја прашал кралицата дали размислува за тоа да го намали бројот на кучиња за кои се грижи, таа кратко му одговорила – „Немаше да ве повикам ако знаев дека тоа ќе биде вашиот совет“.

Д-р Магфор раскажа дека кучињата на кралицата биле пријателски настроени, слатки и многу сакани.

„Таа беше извонреден тренер. Можеше да ги пореди во полукруг, а тие стоеа и трпеливо ја чекаа нивната храна, која секогаш им беше ставена во голем сребрен послужавник и во посебни чинии за секое куче“, сподели тој.

Принцот Ендру ќе се грижи за Мјуик и Сенди, кучињата на кралицата Елизабета