Општина Кисела Вода после голем број поплаки од жителите, денеска конечно ја расчисти количината на ѓубре на главната улица „Христо Татарчев“ во населба Припор, која од ден за ден сѐ повеќе се зголемуваше и повеќе од еден месец го „окупираше“ тротоарот, а во последните денови пред да биде собрана, започна да ја блокира и улицата.

„Слободен печат“ пред две недели информираше за огромната дива депонија со кабаст отпад во скопската населба Припор, откако Општина Кисела Вода започна тримесечна акција за собирање на овој тип отпад, притоа оставајќи мал број локации за депонирање на ѓубрето во оваа населба, односно само една, веднаш до месната заедница, каде сите жители ги оставаат своите непотребни кабасти предмети.

ФОТО | „Планина“ од стар мебел речиси еден месец го блокира тротоарот во Припор – Слободен печат

Жителите велеа дека ѓубрето доаѓало од повеќе околни села и населби, од каде луѓето со своите автомобили секојдневно паркирале на оваа локација и оставале огромни количини мебел и бела техника, а планината ѓубре беше толку голема што на неколку места излегуваше и на главната улица, а исто така започна да го узурпира и објектот на месната заедница.

Пред десетина дена кабастиот отпад се состоеше најмногу од мебел, двоседи, троседи, фотелји и кревети, а последно на тоа место можеа да се забележат веце школки, прозори со рамки, влезни врати, туш кабини, машини за перење алишта и автомобилски гуми, за денеска конечно тоа место да биде исчистено.

Граѓаните беа бесни и во неколку наврати бараа Општината итно да го собере ова ѓубриште и да го ослободи тротоарот со цел безбедно минување на пешаците, а сметаат дека во иднина Општината треба подобро и поефикасно да ги креира овие акции за собирање кабаст отпад, бидејќи очигледно овој концепт не е во полза на луѓето во околните куќи кои секојдневно со недели се соочуваа со оваа не толку убава глетка.

– Ги преминаа сите граници, ова е навистина грозна глетка, луѓе од секаде постојано застануваат со автомобилите и „растовараат“ секакво ѓубре. Ако Општината не реагира, оваа „планина“ од ѓубре за брзо време ќе започне да ја блокира и улицата „Христо Татарчев“ – велеше жител од Припор за „Слободен печат“ кој во текот на изминатите денове испрати неколку фотографии на кои можеше да се забележи колкава количина на кабаст отпад е насобрана на тротоарот.

Според предвидениот план на оваа тримесечна акција која завршува овој месец, општинските служби треба да го собираат кабастиот отпад еднаш месечно, помеѓу 15-тиот 20-тиот ден од секој месец.

Од Општина Кисела Вода денеска не информираа дека огромната количина отпад денеска е целосно собрана и местото е исчистено.

-Собирањето и чистењето на отпадот се одвиваше согласно однапред предвидена динамика и термини, при што приоритет беа токму отпадите депонирани во рамките на дозволените периоди. Натрупаниот отпад за кој говорите е резултат на несовесно постапување на одредени поединци кои кабаст отпад исфрлаа пред или по утврдените термини. Овој отпад, кој беше надвор од предвидениот план, денес е речиси целосно отстранет – велат од Кисела Вода.

Според очевидци, „чистката“ започнала во претпладневните часови, кога камиони и багери на Општина Кисела Вода пристигнале пред месната заедница во Припор и неколку часа го собирале кабастиот отпад со што по еден месец повторно се ослободи тротоарот покрај главната улица за минување на пешаците.

Од Општината истакнаа дека оваа акција била спроведена со најдобра намера, но сметаат дека дел од граѓаните не ги почитувале нејзините правила и депонирале надвор од предвидените рокови и локации, што резултирало со создавање на волку големо ѓубриште.

– Општина Кисела Вода ја спроведе оваа акција со најдобра намера – заради грижата за животната средина и здравјето на своите граѓани. Но, за ваквите иницијативи да бидат целосно успешни, потребно е заемно почитување на правилата и одговорност од сите засегнати страни- велат од локалната самоуправа

Исто така, оттаму информираат дека по завршувањето на оваа тримесечна акција, за секој оној кој во иднина ќе биде затекнат како незаконски фрла секаков отпад вон предвидените локации и датуми ќе биде санкциониран согласно законските прописи за заштита на животната средина.

И покрај планот за собирање на отпадот еднаш во месецот, што според жителите е навистина малку со оглед на количината ѓубре која се депонира, овој април припорчани со недели ги чекаа општинските комунални служби целосно да ја расчистат оваа дива депонија, кои доцнеа неколку дена по предвидениот рок на овој проект.