Познатиот холивудски актер Џорџ Клуни се појави со нов изглед, кој предизвика бурни реакции кај јавноста. Пред театарот „Винтер Гарден“ на њујоршкиот Бродвеј, каде што со Џулија Робертс се дружеше со обожавателите, 64-годишниот актер беше забележан со темна боја на коса, што е голема промена од неговата препознатлива седа коса.

Промената, како што открија извори блиски до актерот, е направена специјално за неговата улога во театарската претстава „Добра ноќ и среќно“, која е адаптација на истоимениот филм од 2005 година.

Покрај новата боја на коса, Клуни го освежи својот изглед со зализана фризура и темни очила за сонце со синкасто-виолетови стакла, што на многумина им личеше на стил инспириран од италијанските криминални филмови.

Клуни во претставата го толкува ликот на легендарниот новинар и телевизиски водител Едвард Р. Мароу. Претпремиерата се одржа на 12 март, а официјалната премиера е закажана за 3 април.

Актерот уште во февруари беше виден со новата боја на коса, а многумина тогаш се пошегуваа дека поминува низ „криза на средни години“, не знаејќи дека промената е поврзана со неговата улога.

„Мојата сопруга ќе го мрази ова, бидејќи ништо не те прави да изгледаш постаро како кога човек во моите години ќе ја обои косата. А моите деца сигурно ќе ми се смеат“, изјави Клуни, кој со сопругата Амал има седумгодишни близнаци, Ела и Александар.