Колекција од 16 метални артефакти од железното и римското време, откриени од маж кој користел детектор за метал на остров во Велс, Велика Британија, е прогласена за национално богатство.

Иан Портер ги открил овие вредни предмети уште во 2020 година додека ги истражувал пасиштата и изворите на Англеси во близина на западниот брег на копното на Велс се вели во изјавата на Музејот на Велс.

„Бев толку возбуден кога ги најдов овие предмети. Помислувам како последната личност што ги допрела овие предмети живеела пред речиси две илјади години и тоа покажува дел од историјата на островот“, изјавил Портер.

Портер веднаш ги известил властите за преносни антиквитети во Велс, кои ги евидентирале археолошките наоди кои вклучувале делови за кочија од железното време од крајот на првиот век, како и делови од коњаничката опрема на римските коњаници од сличен период. Има три делови од уздата, водилка за узда, украсна овенска глава. Откриена е и голема, комплетна бакарна шипка тешка 20,5 килограми, а покрај неа украсен брош, четири монети и оловен дел за поправка на сад.

„Оваа културно измешана група предмети, вклучувајќи делови од кочија и римска коњаничка опрема, е многу важно откритие за островот. Тие се создадени или за време на инвазијата на островот од страна на римската војска или веднаш по него. Драматичните настани сликовито ги опишува римскиот историчар Тацит, кој ја опишува чудната прва средба меѓу римските војници и друидите од Англеси. Оваа група на предмети илустрира како водните локации, вклучително и светото езеро Лин Кариг Бах, се сметале за важни места за религиозни церемонии во ова време на конфликти и промени. Главата на овенот, веројатно украс за кочија или стап, е украсена во доцен келтски уметнички стил – изјави Адам Гвилт, главен куратор за праисторија во Музејот на Велс.