Дечко од Калифорнија ја изненадил својата девојка со тоа што ја запросил откако го пронашол нејзиниот веренички прстен, за кој мислел дека е изгубен во разорните пожари кои го зафатија Лос Анџелес и уништија сè што поседувале, пишува „Њујорк пост“.

Брајан Мекши и Стефани Рејнор ја посетиле нивната изгорена куќа во Алтадена за да проверат дали нешто останало недопрено од пожарот.  За време на посетата Мекши одлучил да бара прстен што го криел во фиоката од неговото биро.

Двојката побегнала од својот дом на 7 јануари пред целосно да биде зафатен од пожар кој уништи над 140.000 хектари во Лос Анџелес. Мекши ѝ предложил на Рејнор да ги пребараат урнатините каде што се наоѓа бирото, но тој не ѝ открил дека го бара прстенот.

 

View this post on Instagram

 

A post shared by Brian Leo McShea (@newsgit)

„Размислував: Можеби дијамантот може да преживее и можеби ќе го најдеме тоа мало камче“, рекол Мекши.

Заедно почнале да копаат низ пепелта и урнатините.

„Баравме на местото каде што беше мојата маса, се надевав дека ќе ја најдеме тоа мало камче – искрено, не очекував многу. Но, потоа извадив пепел и урнатини и одеднаш – ете го, мал прстен“, рекол Мекши.

Мекши, кој планирал да ја запроси својата девојка пред пожарот, не можел да дочека. Тој го поставил прашањето точно каде некогаш се наоѓала нивната куќа.

„Клекнав на едно колено и реков: Еј, ќе се омажиш ли за мене?“,  раскажал тој.

„Бев во целосна заштитна опрема, со патент, со бела качулка. Плачев“, рекла Рејнор.

Иако сè уште не го одредиле датумот на венчавката, двојката планира да остане во истата област и да го обнови својот дом.