Пластичните хирурзи се сè позагрижени за новиот предизвик на социјалната мрежа Тик-ток што доведе до повеќе смрзнатини кај младите.

Речиси 70 луѓе, од кои некои на возраст и од десет години, се пријавиле во амбулантата Викторија во Њукасл, Англија, со такви повреди. Биле потребни неколку пластични операции за да се спаси нивната оштетена кожа.

За порастот на овие рани, кои се предизвикани од изложеност на многу ниски температури, се обвинува  Тик-ток, каде што младите луѓе се снимени како прскаат дезодоранс на својата кожа од непосредна близина. Се покажало дека налетот на аеросол од дезодорансот во траење од 15 секунди, кој се држи на растојание од само пет сантиметри, ја намалува температурата на кожата за повеќе од 60 степени Целзиусови, што е доволно за да предизвика екстремни смрзнатини, пишува „Дејли мејл“.

„Влијанието на социјалните мрежи врз младите не може да се потцени. Пред 20 години изгореници од студ биле речиси незапамтени“, рекол пластичниот хирург д-р Конор Баркер.

Тој истакнал дека шишињата со дезодоранси треба да имаат предупредување дека прскањето блиску до кожата може да доведе до сериозни повреди.

„Постојат предупредувања за запаливост и вдишување на растворувачите, но не и за предизвикување повреда на кожата“, додава д-р Баркер.

Десетгодишно девојче од Хертфордшир завршило на пластична операција минатата година, откако од непосредна близина прскала дезодоранс на својата кожа, што го видела на споменатата социјална мрежа. Подоцна хирурзите предупредиле дека може да бидат потребни и до две години за целосно заздравување на нејзините повреди.

Доктор Мани Рагбир рекол дека тоа е „алармантен проблем што ги погодува децата што може да се спречи, но исто така бара итно внимание“.