Еротски мозаик од периодот на Стар Рим, кој бил украден од офицер на Вермахтот во 1944 година, е вратен на своето вистинско место – во Помпеја, Италија, објави „Анса“.

Офицер на нацистичката армија, кој бил одговорен за воениот синџир на снабдување во Италија за време на Втората светска војна, му го предал украдениот мозаик на кој е прикажан вљубен пар, на друг Германец. Семејството на тој Германец го вратил мозаикот, но и благодарение на интервенцијата на припадниците на италијанската единица за заштита на културното наследство од Рим, како и дипломатските врски и притисок.

Мозаикот се смета за предмет од исклучително културно значење. По повод враќањето на овој мозаик, италијанските конзерватори на стари уметнички дела организирале церемонија.

Патем, и во Помпеја и во Херкуланеум биле откриени многу еротски слики и статуи, кои многумина ги нарекле порнографски. По откривањето на овие градови уништени од ерупцијата на Везув во 79 година од нашата ера, неаполскиот крал Франциск I од Сицилија побарал еротските дела да бидат заклучени и тие биле скриени од јавноста речиси 200 години.

Поради постоењето на еротски уметнички дела, во еден момент била развиена теоријата дека овие градови биле населени со неморални луѓе и дека ерупцијата на вулканот всушност била Божја казна за неморалот во овие населби на Римското Царство.