Џастин Тимберлејк на својот Инстаграм објави дека има здравствени проблеми и дека му е дијагностицирана Лајмска болест. „Ако сте ја искусиле оваа болест или познавате некого што ја има, тогаш сте свесни дека живеењето со неа може да биде многу исцрпувачко, и ментално и физички“, рече тој, пренесува „Гардијан“.

Ова признание дојде во време кога Тимберлејк ја заврши својата двегодишна турнеја „Заборавете го утре“, а неколку пати во текот на истата беше критикуван за слабите настапи.

Тој откри дека бил шокиран кога дознал за својата дијагноза.

„После тоа, барем можев да разберам зошто чувствував огромна болка и само луд замор и гадење на сцената“, тврди тој.

Инаку, Лајмската болест се пренесува преку каснување од заразен крлеж и првично може да предизвика симптоми слични на грип, како што се главоболка, болки во зглобовите и замор. Подоцнежните симптоми може да вклучуваат парализа на лицето, вкочанетост, отечени зглобови и оштетување на нервите.

Зборувајќи понатаму за неговата дијагноза, Тимберлејк истакна дека се борел со одлуката да продолжи со турнејата и покрај здравствените проблеми. Како што објасни, радоста што му ја носат настапите е поголема од привремениот стрес што го чувствувало неговото тело. Тој понатаму тврди дека е навистина среќен што продолжил до крај.

„Не сакав да зборувам за тоа бидејќи отсекогаш сум воспитан да ги чувам работите за себе. Сепак, се обидувам да бидам потранспарентен во врска со моите борби за да не бидат погрешно протолкувани. Го споделувам сето ова со надеж дека сите можеме да најдеме начин да се поврземе повеќе. Би сакал да го дадам својот придонес за да им помогнам на другите кои се борат со оваа болест“, тврди тој.