ФОТО | Доделени Златните глобуси: Деми Мур првпат ја освои престижната награда
На 82. доделување на наградите „Златен глобус“, каде се наградуваат телевизиските и филмските достигнувања, филмот „Бруталист“ беше прогласен за најдобра филмска драма во 2024 година, „Емилија Перез“ за најдобар филмски мјузикл, а меѓу најдобрите актери се Фернанда Торес, Деми Мур, Адриен Броди и други.
Препорачано
Адриен Броди доби Златен глобус за улогата во „Бруталист“, а Деми Мур ја освои наградата за најдобра актерка во мјузикл или комедија за нејзината главна улога во „Супстанција“ (The Substance), приказна за актерката која „избледува“ и ја бара фонтаната на младоста.
Наградата за најдобра актерка во филмска драма ѝ припадна на Фернанда Торес за улогата во филмот „Сѐ уште сум тука„ (I’m Still Here), додека најдобар актер во комедија или мјузикл му припадна на Себастијан Стен за „Различен маж“ (A Different Man). Наградата за најдобра споредна машка улога ја доби Киеран Калкин во филмот „Вистинска болка“ (A Real Pain), а за најдобра споредна актерка е прогласена Зои Салдана во мјузиклот „Емилија Перез“.
Режисерот на филмот „Бруталист“, Брејди Корбет беше награден со Златен глобус како најдобар во 2024 година, додека најдобар анимиран филм е „Ток“. Најдобар филм од неанглиско говорно подрачје е „Емилија Перез“, а наградата за најдобро сценарио ја зема Питер Штроган за филмот „Конклава“ (Conclave).
За најдoбро кинематографско и боксофис остварување, Златен глобус доби мјузиклот „Злобни“ (Wicked), за најдобра ТВ серија „Шогун“ (Shogun), за најдобра хумористична/музичка серија „Хакс“ (Hacks), а меѓу многуте наградени беа актерите Колин Фарел, Џоди Фостер и други.
Домаќин на наградите беше водителката Ники Глејзер, а пред доделувањето на наградите, на црвениот тепих беше прикажана вообичаената ревија на познати личности кои блескаа во црни, златни и сребрени фустани со повремена црвена или темно зелена комбинација.
Ѕвездата на „Злобни“ (Wicked), Аријана Гранде се издвои, облечена во жолта тоалета од Живанши со боди со мониста, за која рече дека е во чест на жолтиот пат што води до Оз во мјузиклот.
Добитниците на Златните глобуси ги избираат 334 новинари од 85 земји, во споредба со приближно 9.000 гласачи кои ги избираат победниците на наградите Оскар. Гласачкото тело на Златните глобуси беше проширено во последниве години, а организаторите иницираа реформи откако беа критикувани за етички пропусти и недостаток на различност.
