Членот на македонската фудбалска А репрезентација Димитар Митровски официјално стана нов играч на словенечкиот клуб Олимпија Љубљана.

Митровски одлучи да потпише за шампионот на Словенија со договор до лето 2028 година. Клубот од Љубљана објави дека Митровски стана „рекордно засилување“ во историјата на Олимпија.

Иако сумата сè уште не е позната, со оглед на тоа што досега најплатен играч е Нигериецот Блесинг Елеке, се претпоставува дека Олимпија платила повеќе од 800 илјади евра отштета за 26-годишниот десен крилен напаѓач.

Нашиот 26-годишен играч изминатиот период настапуваше во успешните настапи на репрезентацијата на дуелите против Белгија (1:1) и Казахстан (1:0) во квалификациите за Светското првенство 2026.

На клупски план во кариерата играше и за Спортинг Б, Академија Пандев, а својот последен ангажман го имаше во Хрватска настапувајќи две години за Вараждин. Митровски има одлична сезона зад себе, во која постигна осум гола на 28 лигашки настапи за Вараждин.