Ѕвездата на ситкомот „Mike & Molly“ Били Гардел детално опиша како успеал да го промени својот животен стил и на тој начин да изгуби дури 68 килограми.

– Мислам дека во одреден момент човек мора да се погледне во огледало и да сфати дека е време да се погрижи за себе – започна 53-годишниот актер во интервју за „Ентертејмент тунајт“.

Гардел, кој денес има 95 килограми, вели дека е голема предност што сега може да купува облека во повеќе продавници. Сепак, најважното нешто што следувало по губењето на килограмите е што исчезнал неговиот дијабетес тип 2.

– Нема дијабетес, бројот на отчукувања на срцето во мирување падна од 113 на 68. Сега сум прилично здрав – се пофалил тој. Гардел открил дека сега јаде мали, но здрави оброци.

– Јадам како сите луѓе на кои им се потсмевав претходно, да бидам искрен – се пошегувал актерот кој пред две години бил на операцијата – направил бајпас на желудникот.

– Операцијата не беше крај, туку почеток – рекол Гардел и додал дека претходно двапати се откажал од зафатот.

– Ако не сте спремни да започнете здрав живот по операцијата, не правете го тоа. Грижата за себе е многу важна и мислам дека конечно го сфатив тоа. Последниот порок што ми остана е тоа што сè уште пушам цигари, но работам и на тоа – изјавил актерот.

Промената на навиките и здравиот начин на живот многу му помогнале во односот со неговиот 20-годишен син Вилијам.

– На син ми му бев добар пример во многу работи, но не и по прашање здравјето. Затоа сакам да види дека не е важно колку години има некој, бидејќи ако е подготвен да прави нешто од ден на ден, може да промени се. Тоа е пораката што сакав да ја добие – заклучил актерот.