Возачот на Мекларен, Оскар Пјастри денеска победи на трката во Формула 1 за Големата награда на Азербејџан. Австралиецот со триумфот на патеката во Баку стигна до втората победа во кариерата.

Трката заврши под виртуелно безбедносно возило, откако Карлос Саинц од Ферари и Серхио Перез од Ред Бул се судрија во 50 круг.

Второто место го освои Шарл Леклер од Ферари, додека трет беше Џорџ Расел од Мерцедес. Возачот на Мекларен Ландо Норис го освои четвртото место, петти беше актуелниот светски шампион Макс Верстапен од Ред Бул, а шестата позиција ја освои пилотот на Астон Мартин, Фернандо Алонсо.

Возачот на Вилијамс, Александар Албон, го освои седмото место, а осми беше неговиот тимски колега Франко Колапинто. Бодови освоија и Луис Хамилтон од Мерцедес и Оливер Берман кој вози за тимот на Хаас.

Верстапен го држи првото место во генералниот пласман кај возачите со 313 бодови, додека Норис е втор со 254. Првото место кај конструкторите моментно го има Мекларен со 476 бодови, додека Ред Бул е втор со 456.

Следната трка во Ф1 шампионатот ќе се вози на 22 септември за Големата награда на Сингапур.