Претседателката на Европската комисија, Урсула фон дер Лајен денеска испрати покана до Москва за разговори, со цел да се овозможи извоз на украинска пченица која стои во пристаништата како резултат на руската поморска блокада.

„Најважно е да се деблокира Црното Море. Ова е покана за Русија“, рече фон дер Лајен во интервју за Ројтерс на маргините на Светскиот економски форум во Давос.

Таа оцени дека кризата со храна се приближува со полна брзина и дека е потребен некаков дијалог со Москва за да се „отклучат“ 20 милиони тони пченица блокирани во Украина.

„Не може да биде во руски интерес луѓето да умираат од глад во светот поради Русија“, рече фон дер Лајен, додавајќи дека треба да се најде решение за да се создаде коридор за транспорт на храна.

Русија и Украина заедно учествуваат со речиси една третина во светската понуда на пченица, а Украина е и голем извозник на пченка, јачмен, сончоглед и масло од репка.

Фон дер Лајен оцени дека Европската унија треба да го зајакне сопственото земјоделско производство преку обезбедување бенефиции за земјоделците за други култури или да го зголеми производството на пченица.

Што се однесува до финансирањето на обновата на Украина по војната, таа рече дека ЕУ размислува да ги искористи замрзнатите средства на руската централна банка и руските олигарси.

„Основното чувство за правда ни кажува дека треба да го погледнеме тоа и да го разгледаме“, рече таа.

Балтичките држави бараат конфискација на рускиот имот, вклучително и резервите на Централната банка на Русија од 300 милијарди долари, но не е јасно дали таквата постапка на ЕУ би била легална.

Украина на 3 мај ги процени средствата за обнова на земјата на 600 милијарди долари.

„Тоа не е тривијална работа… уништувањето на Украина беше целосно неоправдана војна од Русија, и затоа, ако целиот свет помогне да се обнови Украина, Русија исто така треба да сноси фер дел од тој трошок“, додаде фон дер Лајен.