Претседателката на Европската комисија, Урсула фон дер Лајен, денес ќе го одржи годишниот говор за состојбата на Унијата (SOTEU) во Европскиот парламент во Стразбур, а се очекува да зборува за проширувањето и Западниот Балкан, објави денес „Бриселс тајмс“.

Се вели дека се очекува Фон дер Лајен да се фокусира на глобалните предизвици со кои се соочува Европската Унија, вклучувајќи ги односите ЕУ-САД, континуираната поддршка на ЕУ за Украина во нејзината војна против Русија и европската одбрана и безбедност.

Бриселскиот весник додава дека следниот долгорочен буџет на ЕУ исто така ќе биде високо на агендата, како и одржливиот просперитет и конкурентност, зелената и дигиталната транзиција на ЕУ, вклучително и вештачката интелигенција, и прашањето како да се заштити демократијата и основните вредности на ЕУ.

По критиките за трговскиот договор меѓу ЕУ и САД, недостатокот на транспарентност, нејасните политики за борба против климатските промени, недостатокот на лидерство на меѓународната сцена и нејасниот план за намалување на трошоците за живот во ЕУ и раст на економијата на блокот, „Бриселс тајмс“ заклучува дека Фон дер Лајен ќе се најде во дефанзива.

По обраќањето ќе следи дебата со европратениците за поттикнување потранспарентна и подемократска ЕУ и овозможување на европратениците да ја надгледуваат работата на Комисијата и да помагаат во водењето на политиката на ЕУ.

Ова е првото годишно обраќање за состојбата на Унијата на Фон дер Лајен од почетокот на нејзиниот втор мандат како претседател на Европската комисија пред нешто повеќе од десет месеци.