Фокус на актуелната алтернативна сцена носи фестивалот „Арт Ареа / Артерија“ на „Бегемот“
Книжевно-мултимедијалниот фестивал „Арт Ареа / Артерија“, што веќе девет години континуирано ја промовира современата парадигма на интегративно и интерактивно културно дејствување, во организација на „Бегемот“ ќе се одржи од 12 до 14 септември во кафе-книжарницата „Буква“.
Препорачано
-
1
-
2
-
3
Како и секоја година, фестивалот ќе биде точка на пресек на различни културно-уметнички полиња. Традиционално, освен книжевноста, која е постојан елемент на фестивалот, и годинава „Арт Ареа / Артерија“ е планирана со богата програма од различни културни зони.
Фестивалската тема е „Македонската алтернативна музика“, на која преку неколку тематски настани и концерти во живо ќе ѝ биде посветен вториот фестивалски ден.
Публиката на фестивалот ќе има можност да проследи изложба на фотографии од Наташа Гелева; шест книжевни разговори за новите книги на Оливера Ќорвезироска, Љупчо Петрески, Ѓоко Здравески, Ана Тодоровска, Васко Марковски и Тони Димков; музичка панел-дискусија со учество на Васко Марковски, Елеонора Стојановиќ, Раде Биковски, Филип Букршлиев и Ивица Димитријевиќ; како и музички видеоартови, поетско-музички перформанс и концерти од млади македонски музичари, актуелни на македонската алтернативна сцена.
(Текстот е објавен во „Културен печат“ број 297, во печатеното издание на весникот „Слободен печат“ на 6-8.9.2025)
