Тренерот на фудбалскиот клуб Барселона, Ханси Флик е задоволен од победата од 2:1 над Валенсија во првото коло од „Ла Лига“, но каталонскиот гигант ќе мора да ја подобри својата игра во преостанатиот дел од сезоната, пренесуваат шпанските медиуми.

– Важно беше новата сезона да ја започнеме со победа. Во вториот дел изгледавме подобро, имаше грешки во првото полувреме. Голот пред паузата беше клучен за нас, па бевме подобри во вториот дел – изјави Флик.

Двата гола за Барселона ги постигна Роберт Левандовски.

– Тој е голем професионалец и исклучително важен фудбалер за нас. Многу фудбалски стручњаци гледаат само на неговиот придонес во нападот, но Роберт ни е важен и во одбраната – додаде германскиот селектор.

Посебно го пофали шпанскиот репрезентативец Ламин Јамал.

– Веќе фантастичен фудбалер. Сите сакаат да го видат како игра и се подобрува, не е ни чудо што навивачите на Валенсија го поздравуваат со аплауз.

Тој истакна и дека не размислува за нови засилувања.

– Воопшто не сум загрижен дали ќе донесеме некого, се додека „Ла Масија“ обезбедува такви фудбалски таленти. Фантастично е чувството да имаш толку млади фудбалери.

Илкај Гундоган поради повреда го пропушти дуелот со Валенсија.

– Не беше 100 отсто подготвен, пред неколку дена доживеа удар на натпреварот против Монако. Разговарав со Гундоган, мојот впечаток е дека тој сигурно ќе остане во Барселона. Не знам од каде медиумите добија спротивни информации – вели Флик.

Барселона во следното коло ќе се сретне со Атлетик Билбао.