Денеска од 17.30 часот на стадионот „Вембли“ во Лондон ќе се игра финалето во ФА купот помеѓу фудбалерите на Кристал палас и Манчестер сити.

Најстарото куп натпреварување на светот дојде до самата завршница, претходно за сезонава во англискиот фудбал Ливерпул дојде до пехарот во Премиер лигата, а Њукасл го освои трофејот во Лига купот.

Манчестер сити има шанса да ја спаси сезонава за своите високи критериуми, додека Кристал палас да дојде до својот прв значаен трофеј. Никогаш овој лондонски клуб не бил победник во ФА купот, претходно двапати играше во финалето со порази од Манчестер јунајтед.

„Граѓаните“ го играат третото финале во низа во ова натпреварување, пред две години го совладаа Манчестер јунајтед (2:1), а лани со истиот резултат загубија од градскиот ривал.

Менаџерот на Манчестер сити има прилика да го освои 19 трофеј со „Граѓаните“ и трет во ФА купот кој би им бил осми во нивната историја.