Филмска приказна за ММА шампионот: Го малтретираа на училиште, а сега тој им се смее на Фејсбук
Тешкото детство и бруталното малтретирање на училиште го натераа Израел Адесања да почне да вежба боречки вештини.
Израел Адесања утринава ги водушеви ММА фановите со нокаутот над Пауло Коста и одбраната на титулата во средна категорија во УФЦ шампионатот.
Препорачано
ММА спектакл во Абу Даби, Адесања го нокаутира Коста (ВИДЕО)
Во октагонот, Адесања делува самоуверено, не покажува ни тронка страв иако се бори против опасни борци. Најголеми заслуги за тој став на Нигериецот кој живее на Нов Зеланд има тешкото детство.
Адесања е 31-годишен ММА борец кој е роден во Лагос, но израсна на Нов Зеланд каде малтретирањето на училиште го наведе да почне да вежба боречки вештини.
Семејството Адесања емигрира на Нов Зеланд кога Израел имаше 10 години и тие се наделија во градот Роторуа кој е познат по својата маорска култура.
Тој веднаш стана мета на локалните соученици кои речиси секојдневно го малтретираа на училиште. За да се одбрани од нив, Адесања спасот го најде во боречките вештини, тој почна да вежба кик-бокс каде беше и аматерски светски вицешампион, а во последните неколку години е дел од најбрзорастечкиот спорт на светот, ММА.
Израел Адесања е непоразен во ММА светот, има 20 победи во професионалната кариера, а последните две години е УФЦ шампион во средна категорија.
Иако се наоѓа на врвот, Адесања не го заборава тешкото минато како и учениците кои го малтретираа. Тој открива дека се уште ги има за пријатели на Фејсбук само за да го гледаат како тој сјае, како е на врвот.
– Се уште ги имам за пријатели на Фејсбук. Ме гледаат каде сум сега. Во мојата глава кога ќе ги погледнам сите тие кои ме малтретираа се поголеми од мене, но кога ќе се вратам на Роторуа постојано си велам „Од тебе ли сум се плашел“ – искрен е УФЦ шампионот.
Но, освен што е успешен на спортски план, тој реди успеси и на сите други полиња, Израел Адесања е еден од најпопуларните спортисти на Нов Зеланд, а веќе стана милионер. Последните четири борби му донесоа заработка од два милиони долари.
