Доколку премиерот Христијан Мицкоски не каже кој се обидел да го поткупи за тендерот за изградба на пругата кон Бугарија вреден 560 милиони евра, тогаш тој станува соучесник, смета претседателот на СДСМ Венко Филипче.

-Коридорот 8 е извор на многу дисонантни тонови во Владата. Премиерот излегува со една изјава, министерот за транспорт со друга, министерката за финансии во однос на средствата вели „може – не може“ да се пренаменат. Но, тоа што премиерот го изјави на прес-конеференција е многу сериозно. Зачудува што тој изјавува, а ниту една друга институција за тоа нема информација, нема информација ОЈО, нема информација ниту Антикорупциска, изјави Филипче.

Тој додаде дека изјавата на Мицкоски е со многу сериозни наводи, но зачудува што ниедна институција не е запознаена. Филипче смета дека Обвинителството треба да отвори постапка.

Филипче побара од Мицкоски да ги сподели сите информации до надлежните, и рече дека доколку тоа не се случи, премиерот на некој начин станува директен соучесник во случајот, додавајќи дека го  осудува пристапот на самокористење на владината говорница и испраќањето на пи-ар пораки за вакви сериозни работи, особено што станува збор за проект во кој заем дала и Европската Унија.

Мицкоски изјави дека бил жртва на обид за поткуп и дека тоа е една од причините што нема да го поддржи проектот.

Од Обвинителството рекоа дека не добиле пријава за обид за поткуп за конкретниот случај со пругата кон Бугарија.