Фудбалската федерација на Македонија, соодветно на моментот, во денови на жалост, се воздржува од активности кои не се во склад со почитта што ја искажува во овие тешки моменти.

Во тој контекст, ФФМ сака да нагласиме дека нема да се занимава со одредени интереси на клубови, ниту ќе разменува несоодветни дописи во овој период.

ФФМ верува дека сите фудбалски клубови имаат разбирање и ќе ги почитуваат овие денови соодветно.

– Во таа насока, апелираме до ФК Гостивар да ги почитува овие моменти и своите интереси да ги брани и докажува на зелениот терен, наместо преку дописи и притисоци во јавноста. Посебно, што немаат никаква причина за тоа. Во вакви моменти, фудбалот и спортот воопшто, треба да обединува, а не да се користи за дневни интереси, особено во денови на жалост. Веруваме дека заедно ќе покажеме почит и достоинство – стои во соопштението на ФФМ.

По триумфот на Тиквеш во Кавадарци против Гостивар (2:1), од фудбалскиот клуб Гостивар информираа дека биле отруени со храна во Кавадарци и дека се жртви на голема завера.

Потоа, Градскиот фудбалски клуб Тиквеш објави дека сите информации на ФК Гостивар се невистинити.

Денеска ФК Гостивар продолжи со дописи во јавноста, односно испрати одговор на изјавата на фудбалскиот клуб Тиквеш.

• Одговор на изјавата на фудбалскиот клуб Тиквеш! Изјавата на Тиквеш ја сметаме за доста интересна. Како прво, ние очекувавме од нив да слушнеме порака „нека ви е со помин и посакуваме брзо оздравување“. Поради ова ние не обвинуваме никого по ова прашање, не знаеме кој стои зад овој инцидент.
Разгледуваме секакви можности и веќе ги поднесовме потребните барања за истражување. Второ, многу е интересно што точно го знаат местото и градот на хотелот каде што ние бевме сместени!
Да, ако тоа е толку важно, можеме да направиме корекција. Ние бевме сместени во хотелот што се наоѓа на 10-15 км од Кавадарци. Не ни е јасно која е разликата дали хотелот е во Кавадарци или Неготино. Зашто не е во прашање локацијата на хотелот, туку тоа што бевме отруени во хотелот.
Болницата каде што ги направивме анализите, заедно со нашите адвокати, веќе поднесе жалба против хотелот. Фудбалската федерација на Македонија (ФФМ) исто така е информирана за случајот.

Трето, По кој основ од клубот Тиквеш велат дека немало поплаки пред натпреварот? Нашиот доктор беше запознаен со ситуацијата, а нашиот помошен тренер исто така се жалеше на здравствени проблеми. Можноста за саботажа се појави откако ги добивме резултатите од болничките анализи. Четврто, ве молиме да не зборувате за месецот Рамазан и за нашите фудбалери кои постат. Покажeте почит. На која основа и врз кого клубот Тиквеш ги дава овие информации? Ако зборуваме врз основа на шпекулации, и ние би можеле да кажеме многу работи. Но, ние во моментов зборуваме врз основа на болнички извештаи – стои во одговорот на ФК Гостивар.