Дванаесеттото издание на фестивалот за квир-култура, уметност и теорија „Викенд на гордоста – Скопје“ ќе се одржи од 5 до 16 јуни на четири локации низ Скопје: Музејот на современа уметност, клубот „Станица 26“, МКЦ и Театар Комедија.

„Викенд на гордоста“ е фестивал за квир-култура, уметност и теорија што создава простор за промоција на ненормативните форми на светообразување, односно на односите, афектите, идентитетските позиции, телесните стилови и сензибилитетите што од хетеронормативниот, националистички и неолиберален капиталистички контекст се обележани како квир, ексцентрични и неуспешни.

– Тематот на фестивалот оваа година е „Останувајќи со нелагодноста“. Со оваа тема ги истражуваме потенцијалите и формите на соживот, знаење, светотворење и општествена трансформација, кои може да произлезат од останувањето со нелагодноста, или неволјата, тешкотијата, проблемот, непријатноста – како нешто што го опишува живеењето во кризни времиња, каде се скршени и изгубени нашите хегемониски, традиционални и здраворазумски алатки за навигација на животот и секојдневието.

Оваа година ги испитуваме, актуализираме и претставуваме потенцијалите за отпор кои произлегуваат од критичкото ревалоризирање и присвојување на статусот и атрибуцијата на бидувањето општествено нелагодни, како статус што им се препишува на општествено маргинализираните, распоседнати и исклучени популации, како лица кои прават проблеми и се нелагодност за репродукцијата на нормативните општествени хоризонти.

Останувајќи со нелагодноста и неволјата што произлегуваат од притисоците на коегзистенција со другите, сакаме да предложиме можност за преосмислување на демократијата, заедничкото и заедницата. Ова подразбира можност за градење на алијанси, солидарност и соживот токму преку амбивалентноста и нелагодноста кои го карактеризираат живеењето со другите, односно преку несомерливоста, конфликтноста, контрадикциите, како и привлечноста, љубовта, задоволствата и спокојот, како еднакво присутните димензии на релационоста, интимноста и социјалноста – објаснува Славчо Димитров, проектен координатор на фестивалот.

Фестивалската програма почнува на 5 јуни, во 19 часот, во МСУ, со предавање на Сара Ахмед, на тема „Смарањето (Killing Joy) како квир-проект“. Таа е независна феминистичка истражувачка и теоретичарка која работи на пресекот меѓу феминизмот, квир-студиите и студиите за изучување на расите и е позната по испитувањето на моќта во секојдневниот живот и институционалните култури.

Вечерта ќе заврши со концертна промоција на новиот албум на групата „Светлост“, насловен „Everything Was As It Had Been a Minute Ago“, која ќе започне во 21 часот на платото на МСУ, а се реализира во соработка со дискографската куќа „ПМГ Џез“.

На 8 јуни во клубот „Станица 26“, со почеток од 21 часот, ќе се одржи концерт на Mykki Blanco, меѓународно етаблиран музичар, перформанс уметник и ЛГБТК+ активист. Бланко е познат уште од раните изданија и деби-албумот „Mykki“ (2016), составен од креативната моќ на пионерските мешани касети „Cosmic Angel“ (2012) и „Gay Dog Food“ (2013), со кои ги има поплочено патот за успехот на многумина други нехетеронормативни и родово неконформирачки уметници.

Вечерта ќе почне со настап во живо на балканскиот RnB крал Dzipsii, познат по неговата автентична музика со која секогаш остава јасен личен печат. По концертот ќе следува диџеј-сет со домашната перформанс артистка и истражувачка, Ивана Драгшиќ, одгледана во подемот на скопските подиуми од доцните 90-ти прво како обожавателка, потоа како радиоводителка, па диџејка.

На 10 јуни, со почеток од 20 часот, во Денсинг салата во МКЦ ќе се одржи соло танцовиот перформанс „Batty Bwoy“, во изведба на норвешко-јамајскиот изведувач и кореограф Harald Beharie, кој доаѓа од Осло, Норвешка. „Batty Bwoy“ е солистички настап, што започнува не со прашање или со критика, туку со игра и желба, испреплетени со насилство и фина суровост. Преку реапропријација на поимот „Batty Bwoy“ од јамајскиот јазик, кој во буквален превод на англиски јазик значи butt boy (педер), користен како сленг за квир личност, делото ги искривува и испревртува митовите за црнечкото квир-тело, откривајќи ранливи можности во една заемна интеракција на свесност и наивност.

На 15 јуни, во 21 часот, во Денсинг салата на МКЦ ќе се одржу танцовиот дует „Lounge“ во изведба на Marga Alfeirão, Mariana Benenge, Myriam Lucas и Shaka Lion, во чија основа се наоѓа двојната природа на одморањето, чекањето, движењето и придвижувањето. „Lounge“ претставува дует за две тела кои се идентификуваат како женски и заедно се движат низ состојби на активност и пасивно одморање, до уживање во траењето на повторувачките движења.

На 16 јуни, со почеток во 20 часот, во Театар Комедија, ќе заврши „Викенд на гордоста – Скопје 2024“ со традиционалната вечер на раскажување квир-приказни со наслов „Срамота!“, модерирана од Румена Бужаровска и Ана Василева од „Пич Прич“.