Филмскиот фестивал „Скопје синема сити“, кој веќе една деценија го популаризира жанрот на музичкиот документарен филм, за својата публика го подготви настанот „Загревање“ и од 6 до 8 февруари, во соработка со Кафе и филм „Котур“, организира проекција на три музички документарци.

Деликатесни музички документарци за рок-фотографот Антон Корбајн, групата „Њу ордер“ и музичарот Моби, од 6 до 8 февруари се на програмата во Кафе и филм „Котур“, а во организација на фестивалот „Скопје синема сити“.

– За да го одржиме ритамот до следното фестивалско издание, на кое нѐ чекаат многу изненадувања, од четврток до сабота нудиме загревање со музички документарци во клупскиот амбиент на „Котур“ – истакнуваат од фестивалот „Скопје синема сити“.

Во текот на трите вечери, со почеток во 20 часот, ќе бидат прикажани три интересни музички документарни филмови: „Изнесено на виделина“ за рок-фотографот Антон Корбајн, „Њу Ордер: Декади“ за музичката група „Њу Ордер“ и „Моби Док“ за музичарот Моби.

Филмот „Антон Корбајн: Изнесено на виделина“ го следи животот на холандскиот фотограф кој ги создал некои од најпознатите портрети во изминатите четири декади на дел од најзначајните музичари на нашето време, како Ник Кејв, Дејвид Боуви, групите „Ју-ту“, „Металика“ и „Нирвана“.

Музичкиот документарец „Њу Ордер: Декади“, чија проекција е на 7 февруари, ја прикажува соработката на бендот „Њу Ордер“ со Манчестерскиот интернационален фестивал и, истовремено, ја истражува историјата на групата, вклучувајќи ја и нејзината претходна инкарнација, позната под името „Џој дивижн“.

Последен филм на програмата е „Моби Док“ и ќе биде прикажан на 8 февруари. Станува збор за експериментален биографски документарец за музичарот Моби, кој преку комбинација на интервјуа, реконструкции и архивски материјали ја прикажува неговата трансформација од бунтовен панк-музичар во глобална суперѕвезда и активист.