Меѓународниот поетски фестивал „Литературни искри“ од Гостивар, кој годинава ќе го организира своето десетто издание во чест на 24 Мај, Денот на сесловенските просветители Св. Кирил и Методиј, го објави конкурсот за поетски творби.

Право на учество имаат сите поети од Македонија и од балканските земји. Тие ќе се натпреваруваат во две категории, до 18 и над 18 години. Секој учесник може да конкурира со по три досега необјавени песни, не подолги од 32 редови на својот мајчин јазик (задолжителен е препевот на македонски или на англиски јазик на учесниците на кои македонскиот не им е мајчин јазик).

Темата е слободна, а учесниците треба да ги достават песните во ворд-документ во лекторирана верзија. Заедно со податоци за личен контакт (име и презиме, адреса и место на живеење, возраст и телефонски број) песните треба да се испратат на имејлот [email protected].

Краен рок за пријавување е 31 март 2023 година. Уредно доставените творби ќе ги оценува тричлена комисија, која ќе одлучува за наградите и ќе изврши селекција на авторите кои ќе бидат застапени во заедничката збирка.

(Текстот е објавен во „Културен печат“ број 167, во печатеното издание на весникот „Слободен печат“ на 18-19 февруари 2023)