Десеттото издание на „Крик – фестивал за критичка култура“, во организација на „Контрапункт“, продолжува со критичкото промислување на овогодишната тема „Преобразба“.

Есенското издание почнува со предавањето на секогаш провокативниот и поттикнувачки германско/хрватски филозоф и теоретичар на социо-културните деликатни и актуелни случувања и теми, Борис Буден.

На 30 септември (вторник), со почеток во 19 часот, во Националната галерија, објект Чифте амам, Борис Буден ќе одржи предавање насловено „Дупка во главата или: може ли нешто да се научи од војната?“

Согледувањата на Буден длабоко проникнуваат во сите денешни акутни културно-политички превирања во регионот и во светот, на глобално и локално рамниште, но и во самата тема на овогодишниот „Крик“, која ги поставува прашањата на човековата ентропија и потребата за преобразба на идејата за заедница.

По предавањето ќе следи кратка дискусија помеѓу Борис Буден и Никола Гелевски, како и разговор со публиката. Настанот ќе се одржи на хрватски и на македонски јазик.

Борис Буден е писател, критичар на културата и преведувач. Студира филозофија во Загреб и докторира во сферата на Културната теорија на Хумболтовиот универзитет во Берлин. Во 1990 е основач и уредник на магазинот и издавачката куќа „Аркзин“ во Загреб. Неговите есеи и написи се поврзани со теми од филозофијата, политиката, културната и уметничката критика.

Буден учествува во рамките на разни конференции и уметнички проекти во западна и источна Европа, Азија и Америка, вклучувајќи ја и „Документа XI“. Помеѓу неговите најзначајни преводи на хрватски јазик се и најзначајните дела на Сигмунд Фројд. Борис Буден е постојан соработник на Европскиот институт за прогресивни културни политики во Виена. Предава теорија на културата на Факултетот за уметност и дизајн, во рамки на универзитетот „Баухаус“ во Вајмар и на Универзитетот за применети уметности во Виена. Борис Буден живее и работи во Виена.

Никола Гелевски е директор и основач на издавачката куќа „Темплум“ (1989) (од самиздатските денови), главен уредник на списанието „Маргина“ (1994 до денес), главен уредник на стрип-списанието „Лифт“ (1995-2000 година) и основач и главен уредник на он-лајн порталот „Окно“ (2009 година до денес).

Тој е, исто така, основач и соосновач на повеќе граѓански организации и иницијативи: соосновач на „Контрапункт“ (1999), еден од основачите на Центарот за култура „Точка“ (2003-2009), еден од основачите на здружението „Плоштад слобода“ (2009) и еден од основачите на здружението ЦЕМ – Граѓани за европска Македонија, (2008). Тој е колумнист и неговите колумни се објавени во весниците: „Форум“ (1999-2001), „Утрински весник“ (2001-2009), „Глобус“ (2009-2011) и „Окно“ (2009 до денес ). Автор е на 7 книги и добитник на наградата „Борјан Таневски“ за 2007 година („истакнат колумнист на годината“). Основач е на книжевниот фестивал „Друга приказна“.

Уреднички тим на фестивалот „Крик“ се Искра Гешоска, Артан Садику, Тијана Ана Спасовска и Петар Милат. Постојани пријателски организации се: Мултимедијален институт (МаМа), Загреб; „Куда.орг“, Нови Сад; „Јадро“ – Асоцијација на независната културна сцена, Скопје; КСП „Центар – Јадро“; „Окно“; дизајн-студио „Кома“; „Киоск“, Белград; „Културтрегер“, Загреб; проектен простор „Прес ту егзит“; Национална галерија на Република Северна Македонија.

Предавањето на Борис Буден е поддржано од Гете институт Скопје. „Контрапункт“ и „Крик – фестивал за критичка култура“ се поддржани од проектот Култура за развој на Владата на Швајцарија и е имплементиран од „Хартефакт фонд“. Изнесените ставови во овој фестивал се единствена одговорност на авторите и не мора да ги одразуваат ставовите на Владата на Швајцарија или на „Хартефакт фонд“.