Меѓународниот филмски фестивал „Киненова“ соопшти дека од 30 март до 3 април во киното „Киноверзум“ во Домот на културата „Билјана Беличанец“ во Кисела Вода ќе се одржат проекции на филмови по повод десеттото јубилејно издание, а самата програма ќе биде од хуманитарен карактер.

Целокупниот приход од влезниците на овој настан ќе биде наменет за семејствата на настраданите во несреќата во Кочани.

– По најголемата трагедија во поновата македонска историја, ние како фестивалски тим одлучивме дека програмата која требаше да биде само навестување за десеттото, јубилејно издание на МФФ „Киненова“ 2025, да им ја посветиме на настраданите во големата несреќа во Кочани со давање хуманитарен карактер на истата. Колкава и да е таа капка на материјална и духовна поддршка за блиските на настраданите, сакаме да пробаме да придонесеме кон влевањето надеж и да покажеме минимум одговорност, но во исто време и со иста љубов да оддадеме длабока почит за оние невини души кои ги загубија животите и оние кои го жртвуваа својот за да ги спасат животите на останатите – соопштија од „Киненова“.

Од фестивалот посочуваат дека проекциите на филмови се внимателно одбрани. Станува збор за најистакнатите наградени филмови на минатите изданија на фестивалот.

На програмата се филмовите „Мажите не плачат“ (Босна и Херцеговина / 2017 / 98 мин.) на режисерот Ален Дрљевиќ, „Хотел Пула“ (Хрватска / 2023 / 95 мин.) на Андреј Коровљев, „Кафуле“ (Иран / 2023 / 93 мин.) на Навид Михандуст, „Зад стоговите сено“ (Грција, Германија, Северна Македонија / 2022 / 119 мин.) на грчката режисерка Асимина Проедру и „На сѐ ќе дојде крај“ (Хрватска, Северна Македонија, Србија, Црна Гора, Босна и Херцеговина, Турција, Бугарија / 2024 / 89 мин.) на режисерот Рајко Грлиќ.

(Текстот е објавен во „Културен печат“ број 274, во печатеното издание на весникот „Слободен печат“ на 29-31.3.2025)